حنا ما عندناش مع بورطة ولكن باراكا ما ضحكو علينا. راه قرار ما يدخلوش لمغاربة ما عمرو كان بيدو ودابا باش الشوهة كبرات ما خاصوش يتحمل بوحدو المسؤولية هادي قرارات سيادية

حنا ف"كود" كنا اول جريدة هدرات على كيفاش وزير الخارجية والتعاون ناصر بوريطة دخل بنتو اللي كتقرا فالنكليز فالوقت اللي العشرات من لمغاربة اللي عايشين هنا حصلو برا. شي كان عند ولادو شي كان يقضي غراض شي كان يداوى شي كان سياحة. يعني مشاو على ايام قليلة صدقو محبوسين ودولتهم رفضات دخلهم بحال كيفما دارت دول كثيرة.
واش القضية كانت بيد وزير الخارجية؟ ابدا كانت متدخلة فيها الامني والعسكري والسياسي. وزير الخارجية والتعاون دار اخطاء ولكن ماشي فتدبير هاد الشي بل فتسويقو اعلاميا. فضيحة خروج الوزارة بامر منو فانستاگرام تعطيكم صورة على طريقتو كيف دايرة.
حسب ما كيوصل لقنصليات المغرب فالعالم كاين قرابة 18 الف واحد حاصل برا. طبعا كاين فرق بين واحد يجي عندك للقنصلية ويقول ليك راني حاصل وبين العدد الحقيقي ديال لمغاربة اللي حصلو بالفعل وسافرو فاخر فبراير او بداية مارس وتسدات عليهم الحدود. واخا كلشي من حقو يرجع لبلادو واخا يكون حارگ ايلى بغى يدخل خاصو يدخل.
اوربا راها دخلات ناسها اللي عندهم الاقامة. اللي بغى يدخل يدخلوه. هاد قضية اوربا كتفسر علاش الدولة ناضت حتى الدقيقة تسعين باش دخل مواطنيها. شفنا اسبانيا كتقرر رسميا انها دخل لمغاربة اللي عندهم الجنسية الاسبانية وحتى صحاب لوراق. غادية تكون رحلة من الدار البيضاء لمدريد السيمانا الجاية. بلجيكا وهولندا شوهونا وقالو باللي المغرب اللي رفض يخلي البلاجكة من اصل مغربي يرجعو. حتى فاسبانيا وقع نفس الشي. واخا لمغاربة كيقولو اللا راه لخراين اللي ما قبلو الا ديولهم دوريجين. فالاخير حنا اللي شوههنا.
دابا علاش المغرب ما بغاش يدخل ناسو. هادا سؤال كيبان غبي بصاح. الدولة كتروج راها كتفكر فالاجراءات. كذوب والزعيت علي الشعب. وا بنادم واش كاين 200 مغربي حاصل بسبتة وما قدروش يدخلو لبلادهم اش من لوجيستيك اش من استعداد اش من تخربيق. كار يجيبهم من باب سبتة لشي اوطيل فريستينكا ومارين اسمير وسالى الفيلم.
دابا التسويق باللي بوريطة هو اصل الداء فهاد الفيلم اهانة للمغاربة اهانة لذكاءنا. الدولة هي المسؤولة والخارجية تحطات فورطة كبيرة باش ما خلاوهاش تتحرك ولا تتصرف.
واحد الوقت كان مفهوم. خفنا من العدوى ولكن من بعد كان خاص هادو يدخلو كلهم. يدخلو حسب الاولويات ولو على مراحل. دابا مع رمضان القضية غادية تزيد تتازم. غدا نشوفو وزير الخارجية والتعاون اش غادي يقول فالبرلمان. اكيد غادي يعلن على بداية العودة. كنعرفو خروب بلادنا. حتى كتشد الازمة غادية كتنفارج. وما خاصش شي حد يكون بطل فهاد الفيلم. كلشي مسؤول على اللي وقع للمغاربة اللي حصلو برا