كورونا ماوقفاتش احتفالات عيد الشغل.. النقابات كشفات ل"كود" على أبرز الأنشطة اللي غدير ففاتح ماي

واخا كاين الحجر الصحي بسباب فيروس كورونا المستجد، والخروج بدون سبب وتكوين التجمعات ممنوع، لقات مجموعة من النقابات طرقها الخاصة باش تحتفل بفاتح ماي بحال كل عام، وتعبر على وقوفها بجنب العاملين والشغيلة، بلا احتجاجات أو مسيرات أو وقفات.
الاحتجاجات ديال عيد الشغل والنضال من أجل الطبقة العمالية هذ العام غيكون خافت شوية، بحكم أنه غيدوز فالعالم الافتراضي بالدرجة اللولة، بحيت كاينين نقابات فضلات تدير لقاءات تواصلية من خلال تطبيق زووم، وكاين اللي غتعتمد على تقنية اللايف فالفيس، وكاين فيهم اللي غيكتفي ببلاغات، المهم كلشي غيتحرك وبطرق مختلفة.
النعم ميارة، الكاتب العام للاتحاد العام للشغالين، قال فتصريحو ل"كود"، بللي غيكونو أنشطة ديال الاتحاد فاليوم اللي قبل فاتح ماي، أي ف30 أبريل، وكذلك ففاتح ماي اللي كيصادف اليوم العالمي للشغل.
وأكد بللي الاتحاد غيدير ف30 أبريل، فالصفحة الرسمية ديالو فالفايس، نشرة تعريفية على الاتحاد، خصوصا وأن النقابة يالاه كملات 60 عام على التأسيس ديالها، وغتستمر هذ البرامج التعريفية طيلة اليوم، وهي معدة مسبقا.
كذلك ميارة تكلم على أنشطة فاتح ماي اللي غدير النقابة، "فالصباح مع 11 غتكون، فالصفحة دائما، كلمة ديال الاتحاد ويوم تفاعلي كيتكلم على حصيلة هذ السنة ومطالب الشغيلة ومكاسبها، وغنشارك فيها انا ككاتب عام إلى جانب مجموعة من المتدخليم من المنخرطين"، على حد قولو.
بدورو، قال علي لطفي الكاتب العام للمنظمة الديمقراطية للشغل، بللي النقابة ديالو غتدير اجتماع المكتب التنفيذي ديالها بالتقنية الجديدة ديال زووم، "وكنفكرو جميعا فطريقة الاحتفال بعيد الطبقة العامة، وطبعا حنا دابا كنعيشو فترة الحجر الصحي، وضروري نديرو شي حركة ونبدعو عبر وسائط التواصل الاجتماعي، اللي غنكونو كنتواصلو فيها ما بيننا على الأقل بالنسبة للأطر ديال المنظمة الديمقراطية للشغل عبر مختلف جهات المملكة"، على حساب كلامو.
وقال لطفي، فتصريحو ل"كود"، بللي النقابة كتوجد مجموعة من الشعارات المطلبية وليسلوكَون، عبر مواقع التواصل الاجتماعي، باش تقدم مطالبها للحكومة كذلك كنوجهو مجموعة من الشعارات المطلبية ولي سلوكَون عبر وسائط التواصل الاجتماعي، للحكومة سواء بالنسبة للوضع الحالي ديال الحجر الصحي، أو من بعد انتهاؤو، وأكد بللي خاص ضروري التفكير فالمستقبل وتجاوز الصراعات الاجتماعية فهذ المرحلة، عاد من بعد ترجع النقابة لمحاسبة الحكومة على بعض القرارات المتسرعة، بحال قرار الاقتطاع من أجور الموظفين اللي رفضاتو المنظمة.
بالنسبة لنقابة الاتحاد المغربي للشغل، قال محمد الوافي، عضو الأمانة العامة للاتحاد المغربي للشغل، بللي الاتحاد حتى هو يقدر يدير شي أنشطة فعيد الشغل على مواقع التواصل الاجتماعي، لكن لحد الساعة مازال ما برمج حتى حاجة، وبحال هذ الأنشطة حتى كيقرب الحال عاد كتدار.
ووضح بالقول، فتصريحو ل"كود"، بللي "من الصعب تنظيم نشاط تقليدي فزمن الحجر الصحي، فوقت اللي كينخرط فيه الجميع فحملة وطنية كبيرة لمواجهة فيروس كورونا المستجد، لكن فالمقابل الاتحاد ماغايبقاش مكتوف الأيدي، ويقدر يدير شي حاجة ففاتح ماي".
وأكد بللي من نهار بدا الحجر الصحي، الاتحاد دار مجموعة من الأنشطة والاجتماعات على مواقع التواصل الاجتماعي، وشاركات فيها مجموعة من الفيدراليات الوطنية والفروع المحلية، وحتى التكوينات النقابية المبرمجة استمرات ف e-learning، ومنها حتى التكوينات اللي بشراكة مع المنظمات الدولية.
أما بخصوص نقابة الاتحاد الوطني للشغل فالمغرب، فحتى هي غتحتفل بعيد العمال، تحت شعار "بالنضال والتضامن نحمي الوطن ونصون حقوق الشغيلة المغربية".
وحسب بلاغ للنقابة، حصلات "كود" على نسخة منو، غادي يتم الاحتفال بعد إصدار مذكرة كتبين الإجراءات اللي غتتخذها النقابة باش تحتفل بهذ العيد عبر الموقع الإلكتروني ديالها وصفحاتها الرسمية فمواقع التواصل الاجتماعي.
وحتى الكونفيدرالية الديمقراطية للشغل غا تحتفل بنفس الطريقة، بل كانت هي السباقة باش تفصح على نشاط غتديرو ففاتح ماي مع التسعود ديال الليل فالصفحة ديالها الرسمية فالفايس، وهو عبارة على ندوة فكرية رقمية بعنوان "في حاجة إلى إعادة تنظيم الدولة الاجتماعية"، غيشاركو فيها اساتذة فالعلوم السياسية والاقتصادية، بالإضافة لأنشطة أخرى غيديروها أعضاء المكتب التنفيذي للنقابة.