واش فعلا غيسالي الحجر الصحي.. المصالح الأمنية سدات شارع الزرقطوني وشددات إجراءات المراقبة كثر

سدات المصالح الأمنية شارع الزرقطوني، فعمالة مقاطعة أنفا فكازا، بسباب تداعيات فيروس كورونا المستجد وارتفاع عدد الإصابات بوتيرة كبيرة فالعاصمة الاقتصادية كلها.
وحسب مصادر محلية، فإجراءات إغلاق الشارع بدات من البارح الثلاثاء، حيت دارو رجال الأمن ليباريير على طول الشارع بداية من حي المستشفيات حتى لبوركَون، وحاولو يخويوه من الطوموبيلات باش يقللو من حركة السير فالمنطقة.
وعلى كل رومبوان دارو البوليس باراجات باش يمنعو الطوموبيلات يدوزو ويرغموهوم يديرو دومي طور، وكذلك باش يراقبو واش السائقين هازين معاهم ورقة الخروج الاستثنائي، وخصوصا فالرومبوان اللي حدا التوين اللي كيعرف اكتظاظ.
ومن المتوقع يزيدو يسدو البوليس الشوارع الكبرى المعروفة فكازا، بحال شارع آنفا اللي كيتقاطع مع الزرقطوني، وشارع محمد الخامس.
وغير هذ الأيام، البوليس سدو مجموعة من الأحياء والشوارع فالعاصمة الرباط، بشكل مفاجئ، فخضم هذ حالة الطوارئ الصحية اللي كتعرفها البلاد، ودابا جا الدور على كازا.