الطاكسيات فكازا ماتسوقوش لقرار الداخلية وباقيين يهزو 6.. ونقابي ل”كود”: إلى هز مول الطاكسي 3 غايزيد على المواطن.. و”كورونا” يقدر ينتشر واخا تهز غير 2

الطاكسيات لكبار فجميع الأحياء فكازا، فباب مراكش وفالقريعة والحي المحمدي وفعين السبع، كلهم مازال كيهزو 6 دالبلايص، وقليل فيهم اللي تسوق لقرار وزارة الداخلية اللي لزمات على مالين الطاكسيات باش يهزو غير ثلاثة، بسبب إصابة 38 واحد بيه، جوج منهم ماتو.
المشكل أن حتى اللي بداو يهزو ثلاثة ومتاثلو لقرار الداخلية زادو على المواطن، وولا كايخلص الدوبل ديال داكشي اللي مولف كيخلص، بمعنى أن المواطن هو اللي واكل العصا فآخر المطاف.
“كود” تواصلات مع مصطفى الكيحل، الكاتب العام لمكتب الفيدرالية الوطنية لمهنيي النقل، باش تاخذ رايو فالموضوع، وقال بللي “القرار ديال وزارة الداخلية فاجا كاع مهنيي قطاع النقل، وخصوصا منهم صحاب الطاكسيات، حيت كان خاص تسبقو لقاءات معاهم باش يدارسوه ويناقشوه ويتوصلو لحلول مشتركة”.
واعتبر الكيحل كيقول، فتصريحو ل”كود”، بللي المهنيين اللي مازال كايهزو 6 دالبلايص مابغاوش يضرو المواطن، حيت هكذا مغايطلبوش ثمن مضوبل، و”راه 3 دالبلايص ماشي حل باش المرض ماينتشرش، حيت ممكن انتشر حتى فجوج بلايص”.
وعذر الكيحل مالين الطاكسيات اللي كايزيدو فثمن البلاصة، وقال: “مول الطاكسي مايمكنش يركب 3 دالبلايص بثمنهم الاصلي، حيت غايضيع وماغايلقى باش يدير المازوط، وبالتالي يقدر يوقف، عيطو لينا بزاف دالمهنيين كايتشاورو معانا، لكن النقابة مايمكنش تخلص الفرق ديال الثمن إلا إلى دعماتها الحكومة”.
وقال بللي المهني مايمكنش يكَلس فالدار حيت ماعندو ماياكل “خاص الحكومة، من خلال الصندوق اللي دارت واللجنة ديال وزارة المالية توفر لمونة للناس اللي كَلسو فالدار بسباب هذ القرارات، كيف دارو فدول كثيرة”.
وكشف بللي الفيدرالية تواصلات مع الحكومة ف26 فبراير اللي فات، وحاولات تقنعها بللي خاص يتم اتخاذ تدابير مستعجلة للوقاية من تفشي فيروس “كورونا”، و”ماكانتش الحصيلة واصلة لهذ المستوى وحذرنا من خطورة الوباء، لكن رئيس الحكومة تجاهل مراسلتنا”، على حد تعبيرو.
وأضاف “طلبنا باش يتم توفير كمامات طبية مجانا للمهنين، بحكم احتكاكهم الدائم والمباشر مع المواطنين، والوباء راه ماشي غا اليوم دخل راه دخل شحال هذي، وخاص يكونو مواد التعقيم ويتم استعمال الكاميونات لتعقيم الأزقة والشوارع…”
وللإشارة، وزارة الداخلية صدرات قرار باش كَاع الطاكسيات يوليو يهزو 3، كبار ولا صغار، ومايكونش الازدحام فالطوبيس والطرام، ووساىل النقل ماتفوتش الطاقة الاستعابية ديالها، ويكون فيها اكتظاظ.