القضية بدات كتكبر.. مول الباج اللي حط فيديو تشهير صوفيا طالوني بنحيلة تشد فالحبس

قررات النيابة العامة فالمحكمة الابتدائية فسيدي قاسم متابعة الشاب اللي شهر بالفنان المدعو "نحيلة" فواحد الباج ف"فيسبوك" فحالة اعتقال، وتم إيداعو حبس أوطيطة بتهمة "التشهير والتحريض على العنف بواسطة الأنظمة المعلوماتية".
وحسب مصدر قضائي ل"كود"، فهذ القرار اتخذاتو النيابة العامة، صباح اليوم الجمعة، عند انتهاء مدة الحراسة النظرية المتهم المدعو (أ.ب) وعرضو على وكيل الملك.
وللإشارة فهذ خونا حط فالباج ديالو مقتطف من لايف كانت دارتو صوفيا طالوني مع "نحيلة"، وكانت عايراتو فيه وشهرات بيه واتهماتو بأمور ماكايناش، وهذشي جبد عليه بزاف دالمشاكل مع المحيط ديالو.
من بعد ما نشر مول الباج المقتطف اللايف ديال لايف طالوني، طلب منو نحيلة باش يحيدو لأن هذك الفيديو فيه تشويه لسمعتو وتشهير بيه، لكن مابغاش.
ومنين مشا نحيلة يديكلاري بمول هذ الباج، لقى راسو متابع حتى هو بتهمة خرق حالة الطوارئ الصحية، بحكم أنه جا للكوميسارية بورقة خاوية ديال الخروج الاستثنائي، وتمت متابعتو بتهمة إهانة موظفة، وهي التهمة اللي كان نكرها بشدة، فتصريح سابق ليه مع "كود".