امتا يشدو صوفيا طالوني.. البوليس قرقبو على اللي شهر بنحيلة

استطعو البوليس، بتعاون مع الفرقة المركزية لمكافحة الجريمة المرتبطة بالتكنولوجيات الحديثة، يقرقبو على السيد اللي شهر بالفنان المدعو نحيلة، من بعد ما تفاعلو مع الشكاية اللي كان حط ضد مول شي صفحة على فيسبوك، نشر جزء من لايف كان دارو نحيلة مع المتحولة الجنسية صوفيا طالوني، اللي كانت كتستفزو فيه وتسبو وتقول عليه كلام ماكاينش.
وحسب بيان للمديرية العامة للأمن الوطني، رسلاتو ل"كود" اليوم الخميس، فنحيلة كان توجه للدائرة الثانية للشرطة فسيدي قاسم باش يحط شكاية "التشهير والتحريض على العنف بواسطة الأنظمة المعلوماتية" ضد مول الصفحة، والبوليس تفاعلو مع الشكاية فالبلاصة، وتسجلات فنفس النهار، ولبارح الأربعاء مول الصفحة تشد لبارح، وتدار عليه بحث قضائي فانتظار تقديمو للنيابة العامة.
وكتقول المديرية، فالبيان نفسو، بللي المشتكي ماكانش عارف الهوية ديال مول الصفحة ولا فين ساكن، واكتفى فقط بالهوية ديالو الافتراضية، وهذشي علاش البوليس استعنو بالفرقة المركزية لمكافحة الجريمة المرتبطة بالتكنولوجيات الحديثة، وتم انتداب مختبر تحليل الآثار الرقمية والتكنولوجية للقيام بالتشخيصات والتقصيات التقنية الضرورية، حتى استطعو يشخصو هوية صاحب الحساب.
من جهة أخرى، أكدات المديرية بللي تمت متابعة المشتكي بتهم "إهانة موظف و وخرق حالة الطوارئ الصحية" حيت جاب معاه ورقة الخروج الاستثنائية خاوية و مافيها حتى معطيات تعريفية، وبالتالي فهذ الورقة تعتبر "غير شرعية"، بالإضافة لأنه "استعمل عبارات وألفاظ تنطوي على اعتداء لفظي وإهانة في حق موظف للشرطة، مما استدعى إعلام النيابة العامة المختصة وإخضاعه للبحث في الشق المتعلق بالإهانة وخرق حالة الطوارئ الصحية لعدم قانونية الوثيقة"، كيف ما جا فالبيان المذكور.
وشددات مصالح الأمن الوطني، فختام البيان، بللي "البحث التقني في شكاية المعني بالأمر أسفر عن توقيف المتورط فيها وإخضاعه للبحث القضائي، فإنها تؤكد في المقابل بأن إحالة المشتكي على القضاء أملته عناصر تكوينية لأفعال أخرى تقع تحت طائلة القانون".