المغاربة بوحدهم اللي حاسبينو مغربي.. منصف السلاوي: شرف لي نخدم بلادي أمريكا والعالم.. وغادي يكون لقاح من هنا نهاية 2020

فكلمتو قدام الرئيس الأمريكي دونالد ترامب، الخبير البيولوجي منصف السلاوي، اللي تعين اليوم رئيس للجنة المكلفة بالبحث على لقاح فيروس كورونا، ماجبدش سيرة المغرب ولا شار ليه فكلامو، وقال "أنا فخور لأنني حظيت بفرصة خدمة بلادي أمريكا والعالم كامل، ونساعد فتحقيق عملية "Operation warp speed ".
وقال العالم الأمريكي ذو الأصول المغربية ان الهدف من إنشاء هاد اللجنة واضح كيف سبق للرئيس الأمريكي قال واضاف: "كنآمن بالعملية وكنظن انه بامكانا تحقيق هادشي اللي قال الرئيس، واخا هادشي تحدي كبير للفريق ديالنا المكون من عدة وكالات حكومية منخرطة فهاد المجهود، بمساعدة الجيش والشركاء فالقطاع الخاص، والfda والcdc... وغاندير جهدي باش نحققو أهدافنا"، على حد تعبير السلاوي.
وقال السلاوي بللي اطلع مؤخرا على بيانات أولية لتجارب سريعة لفاكسان كورونا، وهاد المعطيات خلاتو يكون واثق أكثر، واضاف: " وتأكدت اننا غانكونو قادرين نخرجو مئات الملايين من جرعات اللقاح قبل ما تسالي 2020، وغانديرو مجهودنا باش نحققو هذشي، وغنركزو كذلك على تطوير وتسريع أدوية للمصابين بكورونا، ونحسنو اختبارات التشخيص فالأشهر القليلة القادمة".