بالنسبة لبزاف ديال المغاربة الذكورة هبة ربانية طبيعية وإمتياز كبير خاص الواحد يقدرها ويحافظ عليها.. وبمجرد شي واحد تعطاه هاد الإمتياز وتزاد ذكر وقرر يتخلى عليه ويولي مثلي او يبدل الجندر ديالو كاع فراه يجوز نكحه وإغتصابه

بالنسبة لبزاف ديال المغاربة الذكورة هبة ربانية طبيعية وإمتياز كبير خاص الواحد يقدرها ويحافظ عليها، وبمجرد شي واحد تعطاه هاد الإمتياز وتزاد ذكر وقرر يتخلى عليه ويولي مثلي او يبدل الجندر ديالو كاع، فهذا مباشرة كيولي يجوز نكحه وإغتصابه حيت ماقدرش نعمة الذكورة وقرر أنه عوض يكون الفاعل في العملية الجنسية( حسب فهمهم ليها) يولي مفعول بيه، وهادي من الجرائم الدينية والإجتماعية والقانونية، واخا هو في نفس الوقت المثلي عند المغاربة هو لي كيهزو ماشي هو لي كيحفر، الراجل لي كيتبع الخرزة بالنسبة ليهم غير مبلي الله يعفو عليه، أما لي كيعطيها هاداك خارج من رحمة الله وكفر بثنائية الذكر والأنثى وآمن بعقيدة قوم لوط.
في أي إتهام بالإعتداء الجنسي غير واضح المعالم، كتلقى ديما الهجوم على الضحية، مرأة أو رجل أو مثلي أو متحول جنسي أو حيوان وفي حالة كان طفل الهجوم كيكون على واليديه، هي لابسة هاكاك آش خرجها فداك الساعة لاش مشات معاه للدار، وفي حالة كان مثلي فراه مكيكونش عندو حتى هاد ترف التبريرات، بل فقط إستغراب من الشكوى والتذمر والمعاناة في حد ذاتها، مادام أنه كيعجبوه الرجال بحالو إذن راه معندوش موشكيل أنه يتناك سواء باغي أو ماباغيش المهم هو يلقى لي يطفيه ، كأن المثلي راه مابقاش بنادم عندو إعتزاز بذاتو وإرادة ورأي وشخصية، بل وللى بحال شي شيفون، عادي أنك تلقاه فالشارع وتضرب والى جابتها الوقت أو تتعدى عليه سواء بدنيا أو لفظيا، وممنحقوش يتشكى لأنه غير مثلي.
هذا هو المنطق لي خدامين بيه هاد اليوماين فالفايسبوك، محامي بعقلو زعمة باغي الحبس لمثلي لأنه من قوم لوط، عقلية ديال ما قبل التاريخ، قوم لوط قوم عاد قوم إبراهيم قوم عيسى موسى، راه حنا مغاربة مقسمين لقبائل وجهات ومناطق ماشي لقوم لوط وقوم محمد، حنا مغاربة فينا المسلم والمومن والمسيحي وليهودي والبهائي ولي ميسواش وفينا المثلي والغيري وناكح يده وناكحة جارها، وناكح بهيمته، خاص القانون يتطبق علىنا كنغاربة وفقط، ماشي يعاقب النوع الجنسي ديال الواحد وهويتو الجنسية غير حيت مختالف، غير حيت واحد قرر أو حس أو تزاد مثلي فراه هانية يجوز الإعتداء عليه.