كورونا خلات وكالين رمضان المرفحين لي كيخويو المغرب فهاد الشهر يحسو بخوتهم وكالين رمضان الحازقين لي كيبقاو حاصلين هنا.. وخلات المغاربة صحاب دخل لدارك ودير مابغيتي يدخلو لدارهم حتى هوما ومايديروش لي بغاو

بزاف ديال المغاربة الى جبدتي معاه الهدرة على وكالين رمضان ولا الأقليات بصفة عامة غادي يقوليك يدخلو لدارهم وياكلوه ولا يديرو لي بغاو في الشارع خاصهم يحتارمو الأغلبية، يعني في الشارع المغربي كيبغي يشوف الأشباه ديالو في نفس البلاصة باش يحس بالألفة، غير يبان شي واحد مختالف فراه خاصو يدخل لدارو ويختالف مع راسو حتى يشبع في الشارع خاصو يكون بحالو بحال خوتو، ولي مسموح ليهم بالإختلاف هوما الأجانب حيت متفق عليه أنهم مختالفين علينا، ولكن حنا حسن منهم حيت غادي نمشيو للجنة، لذا ماشي غريب هاد حملة الهياج الجماعية ديال دخل لدارك تحمي راسك وبلادك، حيت أصلا قبل من كورونا المغربي كان كيعتابر لي مخالف معاه تهديد مباشر ليه في الفضاء العام لذا خاصو يدخل لدارو ويدير لي بغا، وملي يخرج من دارو يولي بحالنا كاملين.
هاد العام مع كورونا ماشي غير وكال رمضان لي دخل لدارو، كولشي دخل وبزز منهم ماشي حتى بالخاطر، وحتى دوك لي كانو كيخويو المغرب في رمضان ويمشيو للبلدان لي فيها بنادم داخل سوق راسو فيما يخص المعتقد، وحقك فأنك تصوم أو تفطر كيضمنو ليك القانون، حتى هوما ماسافروش ووحلو معانا وجربو معاناة وكالين رمضان الفقراء، طبعا ماغاديش يدوزوه محنسرين أو حاصلين مع عائلاتهم والبز والكج كثير، ولكن غادي يحسو بكيفاش غير حيت معندكش مع واحد الطقس ديني فراه كتولي منبوذ فالمجتمع لي كيعتابرك مجرم خاص تعاقب وحتى الدولة كتعتابرك مجرم ودايرة فصل كيحكم عليك بالحبس غير حيت مارستي حق طبيعي ديالك.
كورونا خلات وكالين رمضان المرفحين لي كيخويو المغرب فهاد الشهر يحسو بخوتهم وكالين رمضان الحازقين لي كيبقاو حاصلين هنا، وخلات المغاربة صحاب دخل لدارك ودير مابغيتي يدخلو لدارهم حتى هوما ومايديروش لي بغاو، كورونا دارت خدمة لي مادارهاش الدين قرون هادي، خلات الغني يحس بالفقير وخلات المومن يحس بالكافر والمعكاز، وخلات الحر يحس بالحباس، راه يكون عندك الخيار تخرج وتبقى فالدار حيت عاجبك الحال ماشي هي تبقى فالدار حيت مايمكنش ليك تخرج، راه فرق كبير بيناتهم.