للأسف خصوصية المجتمع المغربي هي السكيزوفرينية ديالو ، وطبعا هي ماكتستاحقش الإحترام

—
فبزاف ديال المواقف كتسمع ديك احترام خصوصية المجتمع ، وحدة خارجة لابسة آش بغات تحرش بيها شي حد فراه هي لي كان عليها تستر وتحتارم خصوصية المجتمع، واحد باغي يشرب بيرة فشي طيراس ديال قهوة فخاصو يدخل لداخل يتخبى ويحتارم خصوصية المجتمع ، واحد ووحدة باغين يتزوجو زواج مدني ماشي عند العدول بمقدم ومأخر الصداق بحال الى شاري نعجة فحتى هوما خاصهم يحتارموا خصوصية المجتمع، واحد باغي يعلن على الميل الجنسي أو النوع الجنسي ديالو ولي يقدر يكون مختالف مع الأغلبية فحتى هو خاصو يحتارم خصوصية المجتمع ويترجل معانا ، وملي كتسول على خصوصية هاد المجتمع وفين كتجلى ، كتسمع داك الجواب العجيب وحنا أخويا راه دولة إسلامية هادي بنادم يحتارم الدين ديالنا، علما أن لي كيقولها ممحتارم فيه حتى الربع.

هنا كيتطرح السؤال واش حنا دولة إسلامية بحال الدولة الإسلامية في العراق والشام ، ولا حنا دولة أغلبيتها مسلمين وصافي ولكن كاين قانون كيحرس على احترام كل واحد فيهم للآخر ، هنا كيلصقوليك ديك حنا دولة اسلامية وعندنا أمير المؤمنين ، أييه أخاي الملك أمير المؤمنين جميع المؤمنين كما قال هو ماشي غي المؤمنين بحالك ، وراه كاين فرق بين أمير المؤمنين وخليفة الدولة الإسلامية، وهنا غادي تدخل فنقاش طويل غادي يخرجك فالحيط مع بنادم عندو عدة شخصيات ورغبات وباغي يذوق الحلوى فالدنيا والآخرة حتى هي ماتمشيش فالتة.

حيث خصوصية المجتمع المغربي كتجلى فأنك كراجل يمكن تبقى تسارى من بورديل لبورديل وتربط علاقة من ورا علاقة وملي تبغي تكمل النص فدينك تقلب عليها فميكتها ، حيث خصوصية المجتمع المغربي هي تدوز رمضان مرمضن مضارب يوميا مهلل ، والى غي سمعتي أنه كاين مغاربة خريين ماصايمينش فالمغرب تطالب بتعذيبهم وقتلهم كاع وتجريدهم من الجنسية ، والى دازت من حداك وحدة غرق ليها المعيور بدعوى أنها ممحتارماش الشهر الكريم ، وليلة العيد تلقاك شاد الصف عند الكراب ومبيت الحومة بلا نعاس ، الخصوصية المغربية هي أنه باغي تطبق الشريعة هنا ونتا النهار وماطال كتحلم بالغربة وبتجيبها كاورية ، الخصوصية المغربية هي تجي من الجامع نهار الجمعة من بعد ماصليتي وسط الشانطي تم جاي مبعصص وتبرم جوان عاد تطلع للدار تتعالج، خصوصية المجتمع المغربي هو تعتابر أيب حاجة سواء فيلم سنمائي أو نوع موسيقي أو طريقة لبس دخيلة على المجتمع وكتهدد القيم ديالو ، الخصوصية المغربية هي تضرب الطاسة ونتا كتدعي الله يعفو عليك من هاد لحرام ، تمارس الجنس ونتا كتدعي الله يعفو عليك من الفساد ويرزقك ببنت الناس ، خصوصية المجتمع هي تكون من أكبر مستهلكي الخمور ومجتمع عامر فساد بشتى أشكاله وتصوت على حزب اسلامي فالإنتخابات ، خصوصية المجتمع هي تتدخل فحياة أي شخص مكيعيش بحالك ، خصوصية المجتمع هي تنصيب المغاربة لراسهم جنودا مدافعين عنها بلا ماعينهم تاحد .
للأسف خصوصية المجتمع المغربي هي السكيزوفرينية ديالو ، وطبعا هادي مكتستاحقش الإحترام .