5 من المغاربة اللي رجعو من الجزائر لقاو فيهم فيروس كورونا

عرفات "كود" من مصادر مطلعة بللي التحاليل المخبرية اللي تجرات للمغاربة اللي جاو من الجزائر كشفات على الإصابة على الأقل 5 منهم بفيروس كورونا المستجد، بينما تحاليل العشرات مازال ماخرجات لحد الساعة.
هذ الخمسة اللي خرجو تحاليلهم إيجابية جاو فالدفعة الثانية ديال لبارح الخميس، واللي بلغ العدد ديالها 300 شخص، فيحين أن الدفعة الأولى اللي كانت جات فالأسبوع اللي فات مافيها حتى واحد مقيوس بكورونا.
ومازال غادي تخضع الدفعة الثانية دالعالقين اللي رجعو، اللي دابا كاينة فواحد من فنادق السعيدية، (مازال غادي تخضر) لتيست ثاني، باش يتم التأكد من صحة النتائج الأولية اللي خرجات فالتيست الأول.
والفوج الثاني دالمغاربة اللي حاصلين فالجزائر جا لبارح الخميس ف3 دالطيارات نزلات فمطار وجدة أنكَاد، قبل ما يتوجهو بالكيران لواحد من فنادق السعيدية، باش يديرو فيه الحجر.
وللإشارة، مازال أزيد من 1000 مغربي حاصل فالجزائر، الأكثرية فيهم كاينين فوهران والعاصمة الجزائر، ومن المحتمل يرجعو على شكل أفواج فالأيام القليلة اللي جاية.