القضية حماضت.. “كورونا” كايدور غير حدا المغرب فأوروبا.. إيطاليا سجلات وفاة 3 بالفيروس وإصابة أكثر من 150

علنات هيئة الدفاع المدني فعاصمة إيطاليا روما، لبارح الأحد، ارتفاع عدد الإصابات فإيطاليا بفيروس “كورونا” ل152 حالة، أغلبها كاينة فشمال البلاد، وكشفا وفاة 3 أشخاص بالفيروس.
وسدات الحكومة الإيطالية على 11 مدينة فمنطقة لومبارديا بعد على اعتبارها بؤرة لفيروس كورونا، كيف منعات الدخول ليها أو الخروج منها إلا بتصاريح خاصة.
إيطاليا.. أكثر دولة أوروبية انتشر فيها “كورونا”
واعلن لوكا زايا، رئيس منطقة فينيتو في شمال شرقي إيطاليا، بللي غيأجل تنظيم فعاليات كرنفال فينسيا، من بعد تفشي الفيروس شمال البلاد.
ووصا معهد روبرت كوخ الألماني للأبحاث والفيروسات المسافرين العائدين من إيطالية باش يشوفو الطبيب فحال ما بدا يكحو أو جاتهم السخانة والضيق فالتنفس، ووصاهم باش يبقاو فديورهم، ويستعملو المناديل ويغسلو يديهم بالصابون بشكل منتظم.
وباعبار أن إيطاليا هي أكثر دولة مصابة بالفيروس فأوروبا، مجموعة من الدول علقات رحلاتها الجوية ليها، منها النمسا وألمانيا، وهذ اللخرة كانت منعات تران جاي من مدينة فينيسيا الإطالية ومتجه لميونيخ فألمانيا من اختراق حدودها، بعدما اكتشفو بللي جوج عيالات وسط التران فيهم السخانة، وتم العزل ديالهم فجزء من القطار.
ودابا مابقاش عند اكثر من 50 ألف شخص الحق فالدخول ولا الخروج من مدن على قدها فشمال إيطاليا بدون إذن خاص، كما أن مجموعة من المدارس علقات الأنشطة ديالها، وتم إلغاء الأحداق الرياضية ومباريات فدوري إيطاليا لكرة القدم.
بريطانيا.. ثاني دولة تقاست ب”كورونا” فأوروبا
لحد الساعة، تم تسجيل إصابة 13 واحد فبريطانيا بكورونا، من بعد ما تقاسو بالفيروس 4 ديال البريطانيين اللي كانوا وسط باطو فاليابان، قبل ما ينقلوهوم لمستشفى خاص باش يخضعو للحجر الصحي ميلتون كينز.
وزارة الصحة من بعد هذ الحادث شددات المراقبة على القادمين من شرق آسيا، وقلبات مؤخرا البريطانيين اللي رجعو من اليابان ولكن الفحوصات كشفات أن حتى واحد منهم ما مقيوس بالفيروس.
الوزارة طلقات حملات للتوعية من اجل الوقاية من انتقال المرض، وحثات على استعمال الماسكات الصحية فالتجمعات اللي فيها الناس كثار، كيف طلبات بضرورة الخضوع للفحص إلى جاو لشي حد أعراض شبيهة باعراض الفيروس.