باش يرفعو كثر الحجر الصحي السبت الجاي. اللي فيهم كورونا فيروس اليوم وغدا كلهم فبنكَرير وبنسليمان

قررات وزارة الصحة ووزارة الداخلية باش يتم تجميع جميع الحالات النشيطة المصابة بفيروس كورونا المستجد، واللي كيبلغ العدد ديالها حوالي 700 إصابة، باش تتكفل بالعلاج ديالها فجوج مؤسسات صحية متخصصة فكل من بنسليمان وبن كَرير، كيف تقرر باش يتم ترحيل جميع الحالات اللي تبث إصابتها بالفيروس مستقبلا إلى هذ الوحدات الصحية الجديدة.
حسب بلاغ مشترك لوزارة الصحة ووزارة الداخلية صدراتو اليوم السبت، وحصلات "كود" على نسخة منو، فهذ القرار جا بعدما تقلصات أعداد الحالات النشيطة، واستطع المغرب يتحكم فالوضعية الوبائية ويواجه الفيروس، وباش يمكن للسبيطارات الجامعية اللي كتستقبل مرضى "كوفيد 19" تتكفل بالمصابين بأمراض أخرى، وتستأنف الخدمات الصحية ديالها بشكل طبيعي.
وأكدات الوزارتين، من خلال البلاغ دائما، بللي الوضعية الصحية ديال هذ 700 حالة مستقرة، والمركزين الصحيين غادي يكفل ليهم العلاجات اللازمة باش دغيا يبراو من المرض، وغادي يتكلفو بيهم أطباء مدنيين وعسكريين فظروف أفضل.
هذ المؤسستين الصحيتين غادي يهتمو كذلك بتتبع المخالطين للمصابين، كيف غيقومو بالتيست للكشف على الفيروس بالنسبة للحالات المشكوك فيها، حتى على مستوى الشركات والفضاءات المهنية فمختلف ربوع المغرب.
وابتداء من 20 يونيو، هذ الإجراءات الجديدة غادي تمكن من تسريع عملية رفع الحجر الصحي، بالأخذ بعين الاعتبار التطور الوبائي فالمغرب.