كيفاش تقتل فنهار واحد المجلس الوطني للصحافة وبقايا وزارة الاتصال. لشكر ونزار بركة لعبو دور كبير فضرب المجلس اللي فيه قياديين من عندهم

خرجة عثمان فردوس وزير الثقافة والشباب والرياضة نهار الجمعة فلجنة القطاعات الاجتماتعية بمجلس النواب باش قال باللي غادي يخصصو 205 مليون درهم غالببتها للصحافة الورقية والمطبعات وشركة التوزيع "سابريس" فيها ضربات قوية لمؤسسة منتخبة مكلفة بالاعلام والصحافة والثانية لوازة كانت وولات قطاع.
هاد لوزير قال باللي تقرر "بتنسيق مع وزارة الاقتصاد والمالية وإصلاح الإدارة، عقلنة و توسيع عملية الدعم المبرمجة برسم سنة 2020 عبر إطلاق مخطط استثنائي لإنقاذ القطاع" كيهدر علي قطاع النشر واللي مرتبط بيه. هادي عادية. ديما وزارة المالية كانت كتكون فلجنة الدعم. ولكن الجديد هو الجملة اللي جاية "تحمل وزارة الاقتصاد والمالية" هاد العبارة دكرات فكتلة الاجور فدفاتر موردي المقاولات الصحافية فراسمال سابريس.... يعني فكلشي. يعني بوضوح. ما بقاش قطاع الاتصال مكلف نهائيا بقطاع الصحافة والنشر. لا يستقبل الملفات لا يهتم بيهم. والو والو.
التهميش الثاني اللي كان كبير وساهمات فيه احزاب سياسية فيها قياديين منها كيسيرو هاد المجلس هو تهميش وزير الثقافة والشباب للمجلس الوطني للصحافة. مؤسسة هدر عليها الدستور. التنظيم الذاتي للقطاع. واخا عرفات مشاكل فعملية التصويت ولكن هي الجهة الممثلة للقطاع زعما. الوزير قال باللي تلاقى مع ممثلي قطاع النشر. هو كيقصد الجمعية المغربية للاعلام والناشرين اللي كان تلاقى مع ممثلين معاهم صباح الجمعة رفقة فوزي لقجع٬ مدير مديرية الميزانية بوزارة المالية والاقتصاد.
لكن اجيو بعدا تعرفو باللي هاد الجمعية فاعضاءها وفمكتبها عبد الله البقالي الكاتب العام للنقابة الوطنية للصحافة المغربية والعضو فهاد المجلس والقياديي الاستقلالي ولكن هو حاضر لكاسكيط اخرى وهي مدير نشر "العلم" وبهاد الصفة دخل للمكتب الجديد. الثاني هوعبد الحميد لجماهري القيادي فحزب الاتحاد الاشتراكي مدير "الاتحاد" الجريدة. بهاد الصفة حتى هو دخل لمكتب الجمعية الجديد.
قرار دخول هادو لهاد الجمعية راه قرار سياسي اتاخدو كل من ادريس لشكر الكاتب الاول لحزب الاتحاد الاشتراكي ونزار بركة الامين العام لحزب الاستقلال وفق مصدر مطلع ل"كود". هما للي قالو باللي بغاو يدخلو لهاد التنظيم.
هادو عندهم ممثلين فالمجلس الوطني للصحافة ولكن ضربوه ماشي ضربو شي حد اخر.
طبعا الضربة الاكبر دارها بنعرفة اللي ما فراسو والو هاد الفيلم كيف ديما اي ان حزب العدالة والتنمية ساهم فهاد الشي ديال تهميش المجلس الوطني للصحافة بحالو بحال الاستقلال والاتحاد