مصدر حكومي ل"كود": الحدود ما تفتحاتش وها اللي مسموح ليه يدخل والتسيت ضروري قبل ما تطلع للطيارة

بلاغ ممفهومش كاع خرجات الحكومة مساء اليوم الأربعاء، وتعلن فيه عن إمكانية ولوج يمكن للمواطنين المغاربة والمقيمين الأجانب بالمملكة وكذا عائلاتهم إلى التراب الوطني ابتداء من 14 يوليوز 2020 (عند منتصف الليل) عبر نقط العبور الجوية والبحرية.
وأوضح مصدر حكومي ل"كود"، أن البلاغ ديال الحكومة لا يعني أن الحدود تفتحات ولي بغا يدخل يدخل ولي بغا يخرج يخرج، مشيرا إلى أن يلا كانت هاد المسألة راه الحكومة مغاديش تشرح شكون يدخل وشكون يخرج.
مسألة أخرى وضحها مصدر "كود". إذ أوضح أن الحدود غادي تفتح بصفة خاصة للمغاربة العالقين وحتى اللّي ساكنين فالخارج وبغاو يدوزو العيد لكبير مع عائلتهوم، وزيد على ذلك الأجانب اللّي ساكنين فالمغرب فقط ماشي أي أجنبي يدخل عندنا.
وأشار المصدر ل"كود" إلى أن هاد الفئات اللّي عندها الحق تدخل المغرب غادي تواكب معاها إجراءات احترازية مشددة، من قبيل إجراء تحاليل لكل واحد غادي يجي عندنا للمغرب، مؤكدا أن شهادة بأن المسافر معندوش وباء "كورونا" ضرورية قبل ميطلع فالطيارة.
وأوضح المصدر نفسه ل"كود" أنه يقدر للمسافرين اللّي غادي يدخلو للمغرب فالباطو يديرو التحاليل ديال كورونا فقلب البَاطُو حقاش السفر بحرا فيه يومين أو ثلاثة أيام. وأبرز مصدر "كود" أن طريقة العودة للخارج غادي ترافقها نفس الإجراءات اللّي كانت فعملية الدخول للتراب الوطني.