واش صلاحيات موظفي الداخلية كثر من وزير. كيفاش واحد فيهم گال: اللي عندو الحجز يسافر" يعني اللي مرفح حسب وزارة لفتيت يتحرك والفقرا ممنوع عليهم

نهار الاحد اللي فات خرجات عليها وزارتي الداخلية والصحة ببيان حتى وزراء فالحكومة ما فراسهمش. فيه انو "تقرر ابتداء من الأحد 26 يوليوز عند منتصف الليل، منع التنقل انطلاقا من أو في اتجاه مدن طنجة، تطوان، فاس، مكناس، الدار البيضاء، برشيد، سطات ومراكش"
وبرراتو ب"الارتفاع الكبير، خلال الأيام الأخيرة، في عدد الإصابات بفيروس "كورونا" بمجموعة من العمالات والأقاليم" وب"خلاصات التتبع اليومي، والتقييم الدوري لتطورات الوضعية الوبائية بالبلاد" وباللي هاد الشي "داخل ف" سياق تعزيز الإجراءات المتخذة للحد من انتشار هذا الوباء"
وفيه باللي يستثنى من القرار "اللي عندهم "الحالات الطبية المستعجلة، والأشخاص العاملين بالقطاع العام أو الخاص والمتوفرين على أوامر بمهمة مسلمة من طرف مسؤوليهم، مع شرط الحصول على رخص استثنائية للتنقل مسلمة من طرف السلطات المحلية"
كلنا شفنا قرار بحال هادا اش دار. مغاربة كثار خرجو باغيين يسافرو قبل منتصف ديك الليلة. زحام وكسايد وفضايح كثيرة.
من غير الغموض اللي فالبيان والعبارات الفضفاضة واللي شار ليهم الاستاذ الباحث عبد اللطيف اگنوش٬ بحال اش نا هي "الدار البيضاء" واش الجهة ولا العمالة ولا الولاية… خرج اليوم شي رئيس قسم فوزارة الداخلية فتصريح خطير ل"تيل كيل"
هاد السيد هو رشيد الخلفي. غير رئيس قسم متابعة فمديرية الشؤون السياسية بوزارة الداخلية. هادا قال بلسانو كلام خطير بزاف. قال حرفيا "السلطات المحلية دارت جهدها باش تسهل الامور للمواطنين اللي باغيين ديك "الرخص الاستثنائية للتنقل" غير "حجز فاوطيل" كافي للحصول عليها.
اولا شكون هاد الخلفي وكيفاش مسؤول صغيور ولى عندو صلاحيات كثر من وزير. وقفو هاد العبث.
الاخطر ماشي هاد الشي. دابا ايلى كنتي فكازا وباغي دوز ايام العيد فاوطيل فاكادير عندك الحق تمشي ولكن ايلى عندك شي بنت خدامة فالدار ودارهم كاينة فنفس المنطقة بسوس ما عندهاش الحق تعيد مع دارهم كل عام. هاد السيد كيقول للمغاربة. عندهم اللعاقة ولاباس عليكم شوية مرحبا سافرو. فقرا ومعدومين بقاو فين كاينين وما تحركوش.
واش عند لفتيت وعي بهاد الشي واش كاين وعي عند هاد الحكومة بهاد الشي.