ما بقى ليها بطولة. حصيلة اصابات لاعبي اتحاد طنجة وصلات هاد الصباح ل23 فيهم 16 لعاب

دابا واش اتحاد طنجة مازال غادية تكمل البطولة؟ البارح كانت عدد الاصابات بين اللعابة واعضاء النادي فحدود 17. عدد مرتفع. هاد الصباح العدد طلع حسب بيان رسمي للنادي الى 23 حالة ايجابية.
بيان النادي قال باللي فهاد العدد 16 لعاب وجوج من طاقم التدريب وواحد من الطاقم الطبي و3 من ادارة النادي ومكلف بمعدات الفرقة.
الفرقة قالت فبيانها باللي دارو التحاليل بعد ما بانت اعراض على اللعابة وان هاد الاصابات وقعات واخا دارت الفرقة احترازات وقائية كبيرة واحترامو للبروطوكول الصحي
هاد الشي غادي يخلي البطولة فشي شكل. دابا كيفاش غاديين ديرو مع ماتشات الفرقة اللي بقاو واش استكمال البطولة اصلا ما كانش خطأ.
دابا يستحيل توقف بعد انتصار الرجا البارح على اسفي وولات الاولى فالبطولة بعيدة بجوج نقاط على الوداد وثلاثة على بركان. الماتشات اللي بقايين غاديين يحددو البطل