لمن ولاؤو وواش خاص الثقة فيه؟ التزلاوي متضامن مع سيطايل وداعم "تفو" ديالها. الرجل اللي كيقدم راسو الامر الناهي فالهولدينك الملكي ورجل ثقة الماجيدي خايف على راسو حقاش عندو جنسية فرنسية.

مجيد التزلاوي اللي كيقدم راسو لكاع كبار لبلاد باللي هو رجل منير الماجيدي مدير الكتابة الخاصة للملك والمشرف علي الهولدينك الملكي اتصل بسميرة سيطايل وفق مصدر ل"كود" وعبر على تضامنو معاها بعد الانتقادات اللي واجهاتها على تصرفها الغبي المتخلف.
القصة بدات باش سميرة سيطايل ردات على افتتاحية ف"لوبسيرفاتور" طرح مدير نشرها مولاي احمد الشرعي اشكالية الجنسية المزدوجة والمناصب الحساسة فالبلاد. ردات على الاقتراح ب"تفو عليك". كثار هاجموها على اسلوبها.
دابا التزلاوي اللي عندو جنسية فرنسية واللي سميرة سيطايل هي اللي جابتو وقدماتو حتى ولى عندو شان وكيخافو منو رجال الاعمال. بعظمة لسانو قال فحوار مع جون افريك هادي سنوات باللي هو اللي كيعين الرئيس المدير العام للهولنديك الملكي "المدى". كانت سميتو اخرى ديك الساعة.
دابا من خلال منصبو وعضوية مجلس الادارة فهاد الهولنديك وشبكة علاقاتو عرف بزاف واطلع على بزافت الامور. واش غدا الى كانت عندو شي متابعة على شي حاجة حصلوها عليه غادي يبقى معانا ولا غادي يطلب الحماية الفرنسية بحسب جنسيتو. هادا هو النقاش. واش خاص واحد فمنصبو بحالو هو يكون حامل لجنسية وحدة ولا لجوج. التمغربيت هادي لا نقاش فيها. مغربي بحال كاع لمغاربة.
غير فمناصب كبيرة خاص باسبور واحد. اللي بغى شي منصب يتخلى على باسبور وصافي