الغزيوي كيرد على اللي اتاهموه بتاعياشت: الله يرحم ليكم الوالدين ويحصلي الشرف نخدم بلادي وخا ماعطالاش لا عليا لا على غيري.. واللي عندو شي دليل بالوثائق على أنني مخزني يجبدو – فيديو

رد المختار الغزيوي، مدير نشر الأحداث المغربية، على الناس اللي كيتهموه بتامخزانيت وخدمة الأجهزة الاستخباراتية، وقال: "هذي هضرة مطلوقة على عواهنها... لكن إلى قالو أنني كننتمي لهذ الجهاز أو ذاك ماعنديش مشكل، حيت هذ البلد السعيد عارفو وعايش منو وعارف قيمتو... وكنقوليهم الله يرحم الوالدين، حيت حاولو يسبوني لكن مدحوني بلا مايشعرو".
وزاد الغزيوي، فحديثو فالبرنامج الإذاعي "بدون لغة خشب" اللي كيقدمو رضوان الرمضاني على إذاعة "ميد راديو"، لبارح الجمعة، "إلى عندوم شي دليل على اختراق شي مؤسسة إعلامية من طرف جهاز كيف ما كان نوعه، سواء لوبي اقتصادي أو أمني أو استخباراتي، يعطيونا هذ المعلومة، الصحافة كتستند على الدليل والمعلومات والوثائق، وماشي خدمة الفيسبوك".
وقال أن المغرب ماشي عطال على الغزيوي أو غيرو يمدحو: "حنا بلد عريق، بلد الأمة، فكيفاش تتخيل أن هذ البلاد بشموخها تتسنى مني ندافع عليها؟ واخا يحصلي الشرف أني نخدمها"، على حد تعبيرو.
وتابع أن الناس ماخلاو ما قالو عليه، وطلقو أكاذيب، ومارسو عليه الإرهاب الفكري، واتهموه بتاعياشت، وحتى بالعمل فمكتب الاتصال الإسرائيلي، "وواخا يقولو العيد غدا، وتتجمع عليا أمة الفايسبوك التويتر وسناب شات والدريات ديال روتيني اليومي، غادي نبقى ندافع على الرأي ديالي" كيف قال.