المديرين ومندوبي الصحة حالفين لا تواصلو مع الصحافيين.. شي مبلوكي نماريهم وشي كيقطع فوجههم وشي كيطلب منهم لوطوريزاسيون من الوزارة.. واليوبي ل"كود": جميع مسؤولي الصحة فالأقاليم والجهات عندهم تعليمات باش يتواصلو مزيان مع الصحافة

بزاف ديال المديرين الجهويين ومندوبي الصحة كيتحاشاو التواصل مع الصحافة فهذ الظرفية ديال أزمة فيروس كورونا المستجد، وحسب ما يروج فالأوساط الإعلامية، فكاينة هضرة على شي اتفاق جماعي بيناتهم باش مايجاوبوش الصحافيين على التيليفون، يبلوكيو نماريهم أو يطلبو منهم يتصلو بوزارة الصحة باش ياخدو لوطوريزاسيون منها قبل ما ياخدو أي تصريح أو يتأكدو من معطيات ما.
جوج ديال المديرين الجهويين ومندوب إقليمي وصلات بيهم الدرجة لأنهم يبلوكيو نمرة صحافية ف"كود"، وبالتالي فاش كتتصل بيهم كتطلعليها وبشكل أوطوماتيكي لابواط فوكال، فالوقت اللي النمرة ديالهم كتصوني بشكل عادي إلى اتصلات بيهم من تيليفون آخر.
وبعضهم الآخر، وحتى واحد من ضمن هذو اللي استعملو تقنية البلوك فوجه الصحافة، كيعتذر ويقول بللي "لا بد من موافقة الوزارة، حيت الظرفية حساسة، وكاين تخوف لا يوقع خلط أو ديكالاج بين المعطيات اللي كتعطي وزارة الصحة والمعطيات اللي عطى هو"، بلا ما نتكلمو على الصنف الثالث اللي بمجرد كيعرف بللي المتحدث اللي معاه صحافي كيقطع عليه فوجهو أو كيتحجج بكونو مشغول أو فاجتماع.
تكلمات "كود" مع محمد اليوبي، مدير مديرية الأوبئة وحاربة لأمراض فوزارة الصحة، على هذ الإشكالات اللي كيعانيوها الصحافيين مع المديريات الجهوية والمندوبيات الإقليمية، فقال، فتصريح جد مقتضب، بللي "جميع المدراء الجهويين والإقليميين عندهم تعليمات باش يتواصلو مزيان مع الصحافة"، ما يعني أن لوطيريزاسيون اللي تكلمو عليها خوتنا ماشي ضرورية، ومن الواجب يتواصلو بلا دريبلاج.
وحتى هذ لوطوريزاسيون كيفاش ممكن للصحافي يحصل عليها من الوزارة الوصية على القطاة، والوزارة مازال ما عينات مكلف بالتواصل جديد فبلاصة القديم اللي جاتو خدمة فوزارة أخرى ومشى بحالو، بعد أيام قليلة من ظهور أول إصابة بالفيروس.
وحتى لو كانت المسطرة الإدارية كتحتم هذ لابروسيدور، كيفاش ممكن الصحافي يتسنى "الأوكي" من الوزارة فقط من أجل الحصول على معطيات محدودة على شي بؤرة ما أو وفيات أو التحقق من المعطيات الرائجة واللي كتخلي الإشاعات تزيد تتكاثر وتتنمى فغياب التواصل السليم.
من جهة أخرى، اليوبي واخا هكذاك كيقدر ظروف المديرين والمندوبين، وكيشوف انه ممكن يكون عدم جوابهم على التيليفون بسبب انشغالهم مع الوضعية الوبائية فالمناطق اللي مسؤولين عليها، واضاف: "حتى أنا مكانجاوبش حيت فعلا كنكون مشغول، لكن بمجرد ما كتسمحلي الفرصة كنتكلم مع الصحافيين وكنقوم بمهمتي التواصلية قدر المستطاع، وغيكون نفس الشي كينطبق على مسؤولي الصحة فالجهات والأقاليم".
وكذلك، من مظاهر انعدام التواصل السليم بين مسؤولي الصحة الجهويين والإقليميين والرأي العام، هذ السياسة اللي دايراها مديرية الدار البيضاء سطات ومديرية الرباط سلا القنيطرة، بحيث من نهار الثلاثاء ماعلنو على تفاصيل الإصابات فالأقاليم، واخا أعداد الإصابات فهاد الجهات مرتفع، المواطنين والصحافيين مابقاو عارفين والو على الوضعية الوبائية فيهم بجوج.