رشيد أيلال مول “صحيح البخاري نهاية الأسطورة” فحوار مع “كود” : قريب نصدر كتاب كيكذب صعود الرسول للسما على بغلة بالجناح

فالجزء الثاني من حوارو مع "كود"، قال رشيد أيلال، الباحث والمفكر المغربي، المعروف بإصداره لكتاب "صحيح البخاري نهاية الأسطورة"، بللي الناس اللي كينتقدو كتابو "كيسبو ويشتمو" على اعتبار أن الأصل فانتقاد كتاب ما هو دراسة مضمونه والابتعاد قد الإمكان على الشخصنة.
وكيستعد أيلال لإصدار كتاب جديد بعنوان "الإسراء والمعراج أسطورة من" فأبريل أو ماي الجاي، "باش هذ المرة إلى قالهم شي حد بللي الرسول طلع على بغلة مجنحة وعلى ما فوق الحمار وأصغر من البغل، غادي يقولوا ليه واقيلا أنت هو البغل اللي كتقول هذ الهضرة هذي"، على حد تعبيرو.
وقال بللي هذ الناس كيقولوا ليه بللي ماعندوش الحق يخوض فالثراث الإسلامي، بحكم أنه خرج من الثانية إعدادي، لكنه كيعتبر هذشي عادي و"أنا كنفتخر بيه، حيت الأب ديالي تخلا على مي، وكان خصني نخرج صغير من المدرسة باش نخدم على الأسرة، وكنت كنمشي عند مول الزريعة نكري من عندو الفلوس باش نقرا، وأنا الآن شاعر وصحافي وباحث، وملتسنيتش المدرسة تقريني"، على حد تعبيرو.
وفالرد ديالو على الباحثين اللي كيتاهموه بسرقة مقتطفات من موضيع فمنتديات على الأنترنت وإدراجها ف"صحيح البخاري نهاية الأسطورة"، قال أيلال : "فعلا أنا اعتمدت على مجموعة من المراجع منها مراجع من الأنترنت، وأي حاجة هزيتها من داخل أي منتدى أو أي كتاب أو أي مقال أو حتى من "فيسبوك" فإنني أشير للرابط منين هزيتها… وأنا ماشي أول واحد وآخر واحد أستعمل الأنترنت كمرجع فدراستي، ونحن فعصر العولمة الرقمية، وضروري خصنا نمشيو مع ركب التقدم وماشي نرجعو لور".
وبخصوص متابعة أيلال للقائمين على معرض الكتاب بسبب مصادرة كتابو، قال بللي مازال ما حط الشكاية، وبللي عوال يوضعها منين يرجع من لبنان بعد تصوير برنامج فقناة تلفزية.
وها الجزء الثاني من حوار "كود" مع رشيد أيلال:
—————–
كود: فين وصلات الدعوة القضائية اللي تقدمتي بيها ضد منظمي معرض الكتاب بسبب مصادرة "صحيح البخاري نهاية الأسطورة"؟
أيلال: مازال ماحطينا الشكاية صراحة، وقبل مانقوم بهذ الخطوة خاصني نتجه للرباط باش نتلاقا مع ناشر دار الوطن، عبد النبي الشراط، باش نوضعو شكايتنا بجوج فالقضية، لكن للأسف مازال ما لقيت الوقت بسبب الخرجات الإعلامية الكثيرة اللي كندير، ثم قريبا عندي سفر لبيروت لإجراء لقاء تلفزي حول موضوع "التاريخ المبكر للإسلام"، واللي غنتناول فيه الحقائق التاريخية للإسلام بعيدا عن خرافات السيرة والأحاديث والحجايات اللي قراونا فالمدرسة.
كود: أعتقد أن هذ حدث مصادرة الكتاب عطى إشعاع كبر ليه وكأنو صدر حديثا، ولصاحبه أيضا..
أيلال: طبعا، وهذكشي كينم على غباء هذ الناس، فطبعا مصادرة "صحيح البخاري نهاية الأسطورة" من المعرض خلات الكتاب يتعرف أكثر، والطبعة الجديدة ديالو تتروج أكثر، وهذا شيء إيجابي، والكتاب بلغ أعلى المبيعات فالمغرب على مدى سنتين، وغالبا غيكون الأمر كذلك حتى هذ السنة، بالإضافة لهذشي الناس فعلا عدفات هرطقات رجال الدين والكتب الدينية الصفراء التي يعيد أصحابها نفس المضامين ويكررونها، والتي على الرغم من أنها رخيصة الثمن ومدعومة إلا أنها مابقاتش قادرة تنافس نهائيا كتب التنوير.
كود: لكن كنشوفو مجموعة من الأشخاص كينتقدو الكتاب بشكل كبير على مواقع التواصل الاجتماعي..
أيلال: بصراحة أنا ما شفت حتى شي انتقادات هادفة، شفت السبان، كيقولوا راه رشيد ايلال ولد الثانية إعدادي، وكيخليو مضمون الكتاب ويشخصنون، إيه أنا أقولها ملء فمي وأفتخر، أنا فعلا ولد الثانية إعدادي، خرجت من المدرسة وأنا عندي 13 سنة، وكنت كنمشي نكري من عند مول الزرعة الكتب باش نقراها حيت ماعنديش الفلوس، با تخلى على الأم ديالي وحنا أطفال، وتزوج وزاد، وخرجت من المدرسة وخدمت على راسي، مع العلم أنني كنت متفوق في دراستي، والناس اللي كيقولوا أنني ولد الثانية إعدادي أخبرهم أني الكاتب الجهوي لنقابة الصحافيين المغاربة بجهة مراكش آسفي، وصحافي فرسالة الأمة، ومدير نشر سابق ديال مجلة الشعب، وصحافي سابق فالمساء، صحافي سابق براديو شدى إف إم، كما أني شاعر وكنت حصلت على الجائزة الثانية عربيا في المهرجان الدولي للشعر اللي كان مشارك فيه 105 شاعر من أزيد من 13 دولة عربية ف2008، لذلك هؤلاء يتصيدون هذه الأشياء ليقولون أنني غير متخصص وماعنديش تكوين، لكن كينساو أن محدث العصر الألباني اللي كيعتبروه قدوة ديالهم ماعندو حتى التحضيري، وكان مواكَني، لكن لأنه يفكر من داخل الصندوق، ويعيد إنتاج العنعنة، روى فلان عن علان أقوالا فيها قولان، راه يعتبر محدث العصر، ولأني أنا أفكر خارج الصندوق فأنا سفيه وفكري يمثل السفاهة والفهاهة والتفاهة… هؤلاء يشتمون ويسبون ويشخصنون، ولا واحد فيهم قد يناقش الحيثيات اللي واردة داخل الكتاب، كيقليك آسي مادام نتا خارج من كذا وعندك كذا ماخاصش نقبل منك أي حاجة وهذي أحكام قيمة، ويا ريت الأمر بقا غير هكذا، بل وصل حد محاولة الاغتيال اللي كانوا تناولوها الصحف، اللي كانوا غيرتكبوها فحقي خلية أجناد البغدادي، لولا يقضة رجال "البسيج" اللي تدخلوا قبل تنفيذ هؤلاء لمخططهم.
كود: كاينين حتى انتقادات فصلب الكتاب، كاين اللي اعتبرك نقلتي فيه فقرات من الأنترنت، ومن ضمن اللي قالوا هذ الكلام متنورون..
أيلال: هذ الأمر تقال مرات كثيرة، ولم يستطع أحد إثبات هذه السرقة، واش آ عباد الله واحد كيقول بللي "صحيح البخاري نهاية الأسطورة" مسروق من منتديات معينة، إيوا هذ صحاب المنتديات ينوضوا يتكلموا ويقولوا بللي رشيد أيلال هز لينا وادعى لنفسو، فعلا أنا اعتمدت على مجموعة من المراجع منها مراجع من الأنترنت، وأي حاجة هزيتها من داخل أي منتدى أو أي كتاب أو أي مقال أو حتى من "فيسبوك" فإنني أشير للرابط منين هزيتها، لذلك كتلقاي فآخر الكتاب لائحة المصادر والمراجع منها الورقية ومنها الإلكترونية، وحاطها بالأسماء ديالها، لذلك كيفاش كيهضرو هذو على السرقة، أنا مافهمتش، السارق هو اللي كيسرق شيء ويدعي أنه لنفسه وهو لغيره، وأنا اعتمدت فقط على 12 مرجعا إلكترونيا وأشرت إليها، فيحين أن الكتب اللي تم الاعتماد عليها هي أزيد من 60 كتاب ورقي، ومن الحقارة والنذالة أن يعتبروا أني خديت من الأنترنت دون إحالة، ولا أعتقد أن هؤلاء متنورين، لأن المتنورون لا يكذبون، ولا يخنذقون أنفسهم مع الظلام لمواجهة النور بالكذب، وكنت تحديثهم يجيبوا دراسة شبيهة للدراسة المخطوطية اللي جا بيها الكتاب سنة 2017، وعجزوا عن ذلك
كود: بعيدا عن السرقة العلمية.. كيفاش كترد على اللي اعتبروا الإحالة على منتديات من الأنترنت "فضيحة" كبيرة، وكيقول بللي هذ المنتديات ماشي مراجع تعتمد فالأبحاث الدراسات؟
أيلال: أنا هؤلاء أعتبرهم باحثي "صلق البيض"، ومازالين عايشين ف1880، ومازال ماوصلهم التطور العلمي والتكنولوجي، وغير كيعادوا الكلام اللي تقال منذ زمن بعيد، وأنا ماشي أول واحد وآخر واحد أستعمل الأنترنت كمرجع في دراستي، ونحن في عصر العولمة الرقمية، وضروري خصنا نمشيو مع ركب التقدم وماشي نرجعو للوراء.
كود: طيب.. رشيد أيلال واش مكايفكرش يصدر كتب جديدة بعد "صحيح البخاري نهاية الأسطورة"؟
أيلال: طبعا، كنتدارس مع دار الوطن إصدار جديد يقدر يخرج فأبريل أو ماي الجاي بعنوان "الإسراء والمعراج أسطورة من"، ووراه مباشرة، بعد عاو ولا عامين، غادي نصدر كتاب حول "الحريات الجنسية في القرآن"، "الإسراء والمعراج" غانخرجوه بمناسبة ذكرى الإسراء والمعراج وغنتكلم فيه على الأساطير اللي رافقات هذ الواقعة، ومن يعد غنقوم بإصدار "الحريات الجنسية في القرآن" باش نهضرو شوية على الجسد، واش ملك شي حد ولا ملكنا حنا، وحنا مايه، فكنعرفو حساسية الجنس عند المسلمين والعرب عموما، لذلك بغيت نتطرق لهذ الطابو باش نكسروا داك الزجاج الشفاف اللي يخفي ما يخفي وراءه.
كود: تكلمو لينا بعدا على كتابكم الجديد "الإسراء والمعراج" اللي كنظنوا أصبح جاهزا للطبع والنشر..
أيلال: "الإسراء والمعراج أسطورة من" هو عبارة عن دراسة تاريخية صرفة باش نشوفو واش قصة الإسراء والمعراج ديال المسلمين أو كانت عند الناس قبل؟ باش نشوفوا واش خداوها من كتب أخرى أو هي فعلا معجزة وقعات للرسول؟ واش القرآن يؤيد مسألة واش النبي عندو معجزات ولالا؟ واش النصوص الدينية منسجمة مع بعضياتها فقضية الإسراء والمعراج ولا متناقضة؟ والناس اللي رواو قصص الإسراء والمعراج شحال كان فعمرهم؟ مثلا بلعباس كان طفل صغير ماعندو حتى 6 سنوات، يالاه انتقل من مرحلة الحبو إلى مرحلة المشي، هو اللي روى القصة، واش عائشة موافقة على قصة الإسراء والمعراج؟ لأنها عندها رأي آخر، وكتقول بللي الرسول كَاع ما حيد من بلاصتو ديك الليلة، يعني أشياء كثيرة يعرفها الشيوخ وكيخبيوها فكتب التراث الديني، وحنا بغينا غير تفضحوها باش يعرفوها الناس، باش هذ المرة إلى قالهم شي حد بللي الرسول طلع على بغلة مجنحة وعلى ما فوق الحمار وأصغر من البغل، غادي يقولوا ليه واقيلا أنت هو البغل اللي كتقول هذ الهضرة هذي..
كود: واش مايمكنش مستقبلا نشوفوا رشيد أيلال ينتقد موروثا دينيا آخر غير الموروث الإسلامي؟
أيلال: طبعا يمكن، وراه للإشارة، قبل ما نخرج كتاب "صحيح البخاري نهاية الأسطورة"، وضعت سلسلة مبثوتة فالأنترنت حول العقيدة المسيحية، كننتقدها، وكنبين فيها الأمور التي أرفضها في عقيدة التثليث المسيحية، إشكالاتها التي لا تنزه الذات الإلهية فقضية التثليث، أعبر فيها عن وجهة نظري، وقد أكون مصيبا أو مخطئا بحال جميع الكتابات ديالي، ولكن فالنهاية أنطلق من أشياء أعتقدها وأومن بها.