خاص.. الوزير السابق مزوار رد على وهبي عبر "كود": كذب علي وأنا ماضغطتش وماتصلتش بحتى شي برلماني باش يدوز تعديل فمشروع ميزانية 2020 على الرسوم الجمركية على مادة البولستر ومشروع شركتي معندوش علاقة بهاد التعديل

صلاح الدين مزوار، وزير الخارجية السابق ورئيس الباطرونا سابقا، كذب داكشي لي روج عليه المحامي عبد اللطيف وهبي، الامين العام ديال البام، بخصوص تعديل دوزو مجلس المستشارين ف مشروع ميزانية 2021، يتعلق بالرفع من الرسوم الجمركية على مادة البوليستير إلى 17،5 في المائة بدل 2،5 في المائة لي كان دار مجلس النواب.
مزوال قال بصريح العبارة ل"كود" :"هادشي لي قال وهبي كذوب ف كذوب"، مضيفا :"كنستغرب من مسؤول حزبي يقول كلام ينافي الحقيقة".
وأوضح مزوار ل"كود" :"والله ما داخل فهادشي ولا اتصلت بشي برلماني ولا بشي حد باش نقوليه يدير تخفيظ ديال الرسوم الجمركية ولا يطلعها"، مضيفا :"وما ممتبعش حتى اش واقع ف لجنة المالية حتى اتصلتو بي ف كود وخبرتوني بلي كاين لي كيتهمني بالضغط على المستشارين باش يدوزو تعديل ف مشروع قانون المالية 2021″.
وتابع المتحدث :"يمكن يكون أطراف أخرى دفعت من أجل تخفيظ هاد الرسوم من أجل قطاع النسيج ولصالح الجمعية المغربية لصناعة النسيج، ولكن أنا مدخلتش فهادشي وماشي ثقافتي".
وأردف مزوار ل"كود" :"استغرب من وهبي بهاد الأسلوب لي دار وماشي من طبعي ندير هاد السلوك وليس من ثقافتي نمشي نضغط على شي حد".
وشدد مزوار على أن المغرب في حاجة استثمار قوي وإلى حماية اقتصاده وليس في حاجة إلى إثارة نقاشات "البولميك" التي لن يستفيد منها أحد.
ووصف مزوار ما قام به وهبي ب"الحسابات الخاوية" و"ماشي منطق ديال بناء اقتصاد قوية وديال المؤسسات".
وكشف مزوار لأول مرة ل"كود"، عن نيته تأسيس شركة في مجال صناعة النسيج، بحيث أن "هاد الشركة الجديدة مغاديش تستورد مادة البولستير عكس ما روج له وهبي، بل غادي تصنعو وكاع المواد الأولوية غاتجيبهم من المغرب"، موضحا :"درنا دراسة على كيفاش تخدم الشركة الجديدة لي مرتقب تشتغل السنة المقبلة".
واضطر بنشعبون لسحب التعديل الذي أدخله المستشارين على المادة 4 من تعريفة الرسوم الجمركية على مادة البوليستير، بعد احتجاج البرلمانيين من محاولات تمرير تعديل لصالح شركة معينة، وهو ما اعتبره نواب في فرق "الاتحاد الاشتراكي، البيجيدي، البام) "توظيفا للبرلمان لصالح شركة معينة عبر تخفيض الرسوم الجمركية المطبقة على مادة البوليستيرات المستوردة من الخارج". وفق تعبيرهم.
وهبي اتهم مبشرة الوزير السابق مزوار بالسعي نحو الربح السريع وتوظيف بعض البرلمانيين بمجلس المستشارين لتمرير تعديل يهم تخفيض الرسوم الجمركية المطبقة على البوليستيرات.
هادشي كذبو مزوار عبر "كود".
هاد مادة البولستير كاتستمعل ف صناعة النسيج، غير هو صناعة النسيج فالمغرب مقدراتش تطور سلسلة الانتاج واخا يزيدو فالرسوم الجمركية، صناعة النسيج باقي معولة على النسيج. وبالتالي معندوش قدرة تنافسية.
حسب خبير اقتصادي فإن "المغرب غارق فالكريدي وشي وحدين باقي باغين يزيدو يغرقوه وخاص الرفع من الرسوم الجمركية والدفاع عن المنتوج الوطنية، خصوصا مزال عندنا ضعف ف سلسلة الانتاج وبالتالي خاص صناعة محلية لهاد المادة ديال البولستير".
جمعية النسيج تاهي طرف فهاد الحرب ضد شركة مزوار، واش هادو بغاو منتوج وطني وصناعة مغربية ولا نبقاو نستوردو كولشي. يلا سبق مزوار غادي يتبعوه شركات أخرى وتكون منافسة، وهنا دور مجلس المنافسة.
الملف ديال شركة مزوار فجرو البرلمان علي بيطار ماشي وهبي عبد اللطيف، بيطار جاب وثائق ورون لجنة المالية وهادشي خلا وزير الاقتصاد والمالية يسحب التعديل مخافة يتهموه بمحاباة شركة الوزير السابق مزوار.