مابغاش يتعاتق.. ستوديوهات "Warner Bros" غتحط 250 ألف أورو لرجل أعمال مغربي بعد استغلال تصويرتو ففيلم العصابات "The Accountant"

كشفات مجلة "the guardian" أن محكمة فالينسيا حكمات بتعويض رجل أعمال مغربي ب250 ألف أورو ضد شركة "warner bros" المنتجة لفيلم المافيات "The Accountant"، من بعد ما بانت تصويرتو فلقطة لمدة ثانية مع صور عائلة Gambino الإجرامية فالفيلم، وتشكا بسباب هذشي، على اعتبار ان سمعتو الاخلاقية والكاريير ديالو تقاست.
ورجل الاعمال المغربي، كتقول المجلة البريطانية، ماكان جايب للدنيا خبار، حتى قالها ليه ولدو اللي تفرج فالفيلم اللي كان خرج ف2016، وهكذا قدم باه شكاية باعتبار ان تصويرتو تستخدمات بلا خبارو وبلا علمو، وانه بسباب هذشي سميتو وصورتو ولاو مقرونين بهذشي دالمافيات اللي هو ماعندو حتى علاقة بيه.
رجل الاعمال المغربي، اللي كيعيش ففالينسيا توجه للمحكمة بعد ظهور صورتو، وطالب بتعوض 250 ألف أورو، وان ظهورو خلاه يتضرر بزاففخدمتو، لكن المحكمة، فمنطوق الحكم، قالت ان تصويرت السيد بانت فثانية وحدة من إجمالي 115 دقيقة، والصورة جات فمحضر توقيف حقيقي من مكتب التحقيقات الفيدرالي، صدر فحق رجل الأعمال، اللي كان شارك فعملية احتيال إلكترونية سنة 2004، وكان دخل عليها للحبس، ولو ان هذشي بعيد على موضوع المافيات.
وواخا الضوسي ديالو موسخ ديجا، قررات المحكمة تعوضو ب250 الف أورو، بحكم ان صورتو تستغلات بلا خبارو، وبلا ما يعطي الموافقة على هذشي، وبانت على أساس انه شريك مفترض لعائلة Gambino الإجرامية، لكن فالمقابل رفضات تعويضو على خسارة الدخل بحكم أنه ماثبتش ليها بالوثائق أنه تكرفص ماديا بسباب هذشي.
مقال "the guardian" فالموضوع هنا:
https://www.theguardian.com/world/2020/dec/15/warner-bros-ordered-to-pay-damages-for-using-businessmans-photo-in-ben-affleck-thriller