نوستيك فحوار مع "كود" بعد قرار مسح فيديوات الساركازم على الإسلام: أنا ما تانمشيش للمغرب ومسألة "زعزعة عقيدة مسلم" ما عمرها كانت عندي مشكل.. واختيار عدم الظهور ما متعلقش بيا أنا ولكن بناس قراب ليا يقدرو يتضررو يلا بنت

مجموعة من المتابعين ديال المدون المغربي هشام نوستيك تأسفو لقرارو بحذف كَاع الفيديوهات والقبسات اللي فيها سخرية من الدين، واعتبروه "باع الماتش"، أو ممكن "تراجع على مبادؤو"، كيف كاين اللي شاف أن قرارو هذا جا بعدما هددوه شي ناس بالكشف على هويتو وممكن هذشي يخلق ليه متاعب كبيرة، أو يكون رجع للإسلام.
وكان وضح نوستيك السبب من هذ القرار "الخارج عن إرادته" بالقول، فسطاتي ليه، أنه ماسلمش، وماضبرش على كَريمة، وماكاينة حتى إكراهات شخصية، لكن شي ناس معاه شاركو فالأعمال الساخرة وتعرضو للتهديد وطلبو منو يحيدها، وكان قرار الصائب بالنسبة ليه هو يلبي هذ الرغبة بدون تردد، فالمستقبل ممكن يجيو أعمال ساخرة، لكن ماشي بنفس الطريقة.
وحيت هذ الموضوع مازال عليه مجموعة من علامات الاستفهام، "كود" حاورات هشام على هذ القرار اللي خداه وأبعادو، وعلى واش هذشي متعلق بتهديدات تعرض ليها حتى هو مؤخرا بالكشف على هويتو، وشناهي الأمور اللي حتى هي غتبدل من بعد ما خدا هذ القرار.
————
"كود": واش مازال غنشوفو هشام في قبسات وفيديوهات ساخرة على الدين مستقبلا، أو "عفى الله عما سلف" كما يقال؟
نوستيك: نعم أكيد غا تبقى الأعمال الساخرة، الحاجة الوحيدة للي غادي تتغير هي الطريقة غا تكون ألطف نوعا ما باش تا واحد ما يتعرض لمشاكل بسبب المشاركة فهاد الأعمال.
"كود": قيل بللي مؤخرا خرجو ناس هددوك حتى أنت ووصفوك ب"العياش" والمخزني.. واش هذشي صحيح؟ وشنو ردك؟
نوستيك: كاين واحد المثل مغربي جميل تيقول الهدرة ما تشري خضرة، أي ادعاء خاصو دليل! وإلا غا نوليو نقبلو أي حاجة. سهل أنك تبني واحد الفكرة/استنتاج فراسك وتظن أنك على حق. عياش/مخزني/خائن أوصاف كاين جوج أغراض من ورائها: أولا باش تخندق بنادم فخانة العدو، وثانيا باش تشيطنو وتبرر أي شر درتيه تجاهو. هادشي كامل لسبب واحد: هو أنه مختالف معك فالرأي. تايذكرني هادشي بالبروباغاندا للي كانت فالحربين العالميتين للي كانو فيها أطراف الصراع تايحاولو بأي طريقة تشويه صورة العدو.
"كود": أوكي، والمخزن والملك والملكية شنو بالنسبة ليك؟
نوستيك: بعدا هاد القضية ديال "نوستيك يساند الملكية" و"نوستيك يطبل للمخزن" مضحكة جدا. يلا سولت علاش؟ الجواب تايكون دائما نوستيك باغي الملكية البرلمانية. من نهار بديت النشاط فالإنترنت وأنا تانقول أن الملكية البرلمانية هي أفضل حل "ممكن" للمغرب. ما عمر هاد الموقف ديالي تبدل. أنك تختالف معايا فهاد الطرح ماشي مشكل، ولكن تنعتني بالمخزني أو العياش فراك غير تاتخربق مع كامل مودتي.
"كود": من خلال متابعتنا لتعليقات كثيرة، كاينين لا دينيين قالو أنك بهذ القرار تنكرتي لمبادئك اللي أبرزها "تخليص الناس من الخرافة"، شنو ردك؟
نوستيك: هدفي ما عمرو كان تخليص الناس من الخرافة، هدفي هو التعايش السلمي بين جميع الناس بغض النظر عن معتقداتهم. وما كاين تا شي تغيير فالمبادئ. ما عرفتش علاش بعض الناس وصلو لهاد الاستنتاج. أي حاجة غيرتها تايكون سببها دائما قرارات أخلاقية بحثة.
"كود": ياكما خايف تتعرف الهوية ديالك وتولي مهدد بالمتابعة بتهمة "زعزعة عقيدة مسلم" وتخاف تدخل للمغرب؟
نوستيك: عارف أنه ممكن يجي الوقت للي نتعرف فيه. اختيار عدم الظهور ما متعلقش بيا أنا شخصيا ولكن بناس قراب ليا للي يقدرو يتضررو يلا كشفت عن هويتي. أنا ما تانمشيش للمغرب أصلا وما عوالش نمشي، لذلك مسألة "زعزعة عقيدة مسلم" ما عمرها كانت مشكل بالنسبة ليا.
"كود": طيب، بالنسبة لانتاجاتك الأدبية اللي خدام عليها الآن واش غتكمل أو لا؟ واش غتبدل فيها شي حاجة؟ والانتاجات المستقبلية عامة كيفاش غتكون؟
نوستيك: من غير "تلطيف" الأعمال الساخرة ما غا يتغير والو. كلشي غا يبقى كيما كان. خدام دابا على كتابي الثالث للي غا يكون على "العدمية البراغماتية" وخدام على البرنامج الرمضاني للي غا يكونو فيه مسابقات وبرامج متنوعة.