في حوار مع كود هشام نوستيك “كافر مغربي” هدر على كتابو الجديد وخروجو من الاسلام: الخروج من الدين اصبح ظاهرة منتشرة بزاف وهادي حاجة رائعة واخا ماشي ساهل تلوح اليقين والمسلمات فالزبل وتبدا حياة جديدة في العقل

حوار مع هشام نوستيك “كافر مغربي” – كود//
علاش هاد الكتاب واش كيميزو على الكتاب الأول؟
الكتاب الأول كان كتاب مذكرات حكيت فيه مراحل من حياتي. الكتاب الثاني هو حوار بين هشام المؤمن وهشام الكافر. نعم كاين سرد لبعض حكايات الماضي، لكن الحوار، للي فيه عرض الأدلة من الجانبين، هو المسيطر.
فمرحلة الشك ديال هشام المسلم خرج هشام الكافر؟ كيفاش عشتي هاد التجربة الانسانية؟
نعم، بعد مرحلة الشك الطويلة خرج هشام الكافر. بعكس ما يعتقد الكثير من الناس، الخروج ما تايكونش ساهل، خاصة يلا عشتي تجربة إيمانية طويلة. الشهور الأولى بالخصوص كانت صعيبة. ماشي ساهل تلوح اليقين والمسلمات فالزبل وتبدا حياة جديدة في العقل. نعم كان قلق، كان أرق، كانت معاناة نفسية، لكن كلشي كان ضروري باش نوصل لما وصلت ليه اليوم من قناعات.
هشام بحالو بحال شباب مغربي اخر عايش هاد الصراع بين المؤمن والكافر اوالشاك، انطلاقًا من حواراتك من نقاشاتك واش تعتقد ان الكفر او اللا إيمان ظاهرة منتشرة وسط الشباب وفين بالضبط اللي فالمغرب ولا خارج المغرب؟
نعم الخروج من الدين، أو على الأقل الشك، أصبح ظاهرة منتشرة بزاف. مابغيتش نقول تاتخلع لأنني تانعتابرها حاجة رائعة. تانظن أن الشباب للي كبر مع الإنترنت، بغض النظر على واش عايش فالداخل أو الخارج، عندو أسلحة تشكيكية أقوى بكثير من أسلحتنا فالماضي. بكل سهولة ممكن تجبد مشاكل الأديان وتتأكد من أي معلومة بغيتي. العالم أصبح اليوم مفتوحا للجميع، غاديين وتانبعدو من عقلية “نحن ضد الآخر”. هاد الانفتاح تايدفع الشباب للإنسانية بدل التقوقع في سجن الموروث الديني.
واش التطرف هو السبب الوحيد بالكفر بهاد الدين ولا كاينة أسباب اخرى؟
التطرف سبب من الأسباب، لكن لا أظن أنه السبب الرئيسي. كيفما قلت، سهولة الوصول للمعلومة وسهولة التواصل مع ناس من مختلف بلاد العالم، ساهمو أكثر فكشف المستور وإسقاط قدسية الأيديولوجيات.