خاص. علاش لقاح سينوفارم مجاش للمغرب ومشا للإمارات؟.. مصادر ل"كود": درنا عقد سري وبكين كعات ورفضات تعطي للرباط الفاكسان بسبب سوء تدبير الحكومة للملف ودبا كاينين مفاوضات لجلب لقاحات أخرى

كشفت مصادر برلمانية بمجلس النواب، ل"كود" عن تفاصيل مثيرة بخصوص فاكسان سينوفارم الصيني.
مصادر قالت ل"كود" بلي وقع مشكل فعلا بين الصين والمغرب، واخا كان عقد سري بين الطرفين.
هاد المعلومة تزامنت مع خبر نشرته كود قبل ساعات من كتابة هذه الاسطر، فيه كنوضحو فيه مسؤولية وزير الخارجية ف تدبير العلاقات مع سينوفارم، خصوصا مسؤوليتو كبيرة بزاف فعدم وصول اللقاح الصيني. من غير الفشل٬ فحتى سفيرنا فالصين ما خدامش. كان مريض، وبوريطة كلف صاحبو القادر الانصاري مدير الشؤون الاسيوية هو اللي يفاوض الشينوا.
دبا المعلومة لي كاينا عند "كود" هي ان الفريق الصيني لي جا المغرب، ودار تقرير، وداه لشركة سينوفارم، اللي تابعة لدولة الصين، وما ادراك ما الصين، النظام الشيوعي القاسح، وحساس، هاذ الفريق عطا تقرير فيه كولشي على تدبير المغرب للتلقيح.
بسبب التقرير الصين كعات، رفضات طريقة تعامل مديرية الادوية والصيدلة مع الفاكسان سينوفارم، وزادو كعاو بسبب اختيار المغرب للقاح ثاني وللي هو فاكسان استرازينيكا.
العقدة السرية اللي بين المغرب والصين حتى واحد معارفش اش فيها، ورئيس الحكومة ومعه وزير الصحة ومديرية الادوية والصيدلة مبغاوش يقولو الحقيقة للمغاربة.
وفي نفس السياق، معلومات "كود" تفيد بلي المغرب مقبل على لقاحات أخرى بحال جونسون جونسون، وممكن موديرنا. الوقت تعطل والفيروس كيتطور والاقتصاد كيموت والناس كتفقد اعصابها. كولشي خايف من حجر صحي شامل وتعقد الامور.
وبعد الفشل لكبير لتدبير قضية اللقاحات من قبل كاع الاطراف فالدولة٬ بان المغرب معول غير على الامارات. البارح بفاس كانت رسالة من رجل الامارات القوي محمد بن زايد نقلها خوه وزير خارجية الامارات عبد الله بن زايد للملك محمد السادس٬ هنا بيان الديوان الملكي المغربي ولا حتى وكالة الانباء الاماراتية ما جبدو والو من غير لكلام لكبير: التعاون والقضايا المشتركة وو
ولكن بعد هاداك اللقاء كان اخر بين نفس المسؤول الاماراتي وبين ناصر بوريطة وزير الشؤون الخارجية. دار فالرباط ماشي ففاس.
وكالة الانباء الاماراتية جبدات كورونا. قالت باللي بن زايد هدر على "تطورات جائحة فيروس كورونا المستجد «كوفيد 19» والتعاون والتنسيق المشترك بين البلدين الشقيقين في مواجهة تداعياته".
طبعا فاش يمكن نتعاونو مع الامارات بخصوص كورونا"؟ والو. هما عندهم لفلوس وعندهم رخصة لتصنيع اللقاح الصيني حقاش عندهم اسهم فالشركة الام٬ اذن بقى البيع والشرا. اي ان المغرب ممكن يجيب لقاح "سينوفارم" من الصين. هاد الدولة كانت عطات لمصر شي بركة تلقح بيها رجالات الدولة.
المغرب بعد ما فشل فجلب لقاء "استرازنيكا" وقبلو اللقاح الصيني٬ جا الوقت باش يجرب حظو مع الامارات. ماشي غير حظو. ما بقاش ليه شي خيارات اخرى. فشل فكلشي بقى ليه غير هاد الباب باش يقدر يجيب لقاح فالاسابيع اللي جاية.
"كود" ربطت الاتصال بمسؤول التواصل بوزارة الصحة وبمديرية الأدوية والصيدلية، مكيجاوبوش كيف العادة.