فاكسان سينوفارم.. غموض تقرير الوفد الصيني لي جا للمغرب والترخيص مزال مخرجش.. ومصدر ل"كود": معندناش تكنولوجيا باش نديرو تيست للفاكسان وندوزو نيشان للتلقيح وكاينين لقاحات عندهم جودة حسن من سينوفارم

علمت "كود" من مصادر مطلعة أن وفدا صينيا رفيعا، زار الرباط، قبل أزيد من أسبوع تقريبا، للوقوف على وضعية التخزين والتبريد وظروف التنقل للقاح الصيني "سينوفارم" المرتقب الترخيص له في الأيام المقبلة.
وحسب مصادر "كود" فإن الوفد الصيني عبر للمسؤولين المغاربة عن ارتياحهم للاستعدادات التي قام به المغرب لاستقبال ملايين الجرعات من بكين. لكن "لحد الساعة المسؤولين المغاربة معارفينش شنو دارو الصينيين فالتقرير لي تعطا للمختبر سينوفارم".
غياب المعلومة وضعف التواصل زاد عقد اتمام شراء الفاكسان الصيني.
وقالت ذات المصادر إن "المغرب اختار التعامل مع اللقاح الصيني وفق شروط علمية مسبقة، إذ لم يرخص له بعد، لأسباب عدة منها أنه ميمكنش يرخص له قبل البلد المنتج، وثانيا قبل ظهور نتائج المرحلة الثالثة من التجارب السريرية، عكس بعض الدول التي اختارت اتباع منهجية أخرى لأسباب سياسية وسيادية".
وأكد ذات المصدر أن "الصين حريصة باش اللقاح ديالها ينجح، خصوصا بالمقارنة مع لقاحات أخرى، كيبان أقل جودة، ولكن بغات تنجحو من خلال توفير ظروف أفضل للعملية التلقيحية، من التبريد للتخزين تال للتنقل باش ميخسرش وتشوه سمعة الفاكسان الصيني".
وتابع ذات المصدر "الفاكسان الصيني معول على المغرب باش يغزو افريقيا".
ولكن "علاش المغرب مجابش لقاحات أخرى"، أوضح ذات المصدر الإطار بوزارة الصحة :"معندناش الإمكانيات ديال التبريد وغيرها".
وعن سبب تأخر اعتماد الفاكسان الصيني سينوفارم، قال ذات المصدر :"معندناش تقنيات عالية الجودة باش نديرو التيست على الفاكسان"، مضيفا :"الدول لي عندها راه دغيا دارت الفاكسان".
دبا لحدود اللحظة مزال معطاتش مديرية الأدوية الترخيص للفاكسان الصيني، واش لأنه مزال متوصلوش بتقرير الوفد الصيني، ولاشنو.. هنا كاين غموض كبير.
الحكومة علنات الخميس 24 دجنبر 2020، بلي المغرب قرر يشري 65 مليون جرعة من اللقاحين المضادين لفيروس كورونا. وبأن عملية التلقيح ستشمل 25 مليون مواطن مغربي.
المغرب موجد تقريبا 3000 محطة للتلقيح، ودار تجارب محاكاة، ولكن معطل في الوقت لي دول كثيرة لقحات.
حاليا منظمة الصحة العالمية كتدرس هاد الفاكسان باش تعطيه ترخيص. ترخيصها موجه للدول اللي ما عندهاش لجان تختار اللقاحات.
اضافة الى هادشي سمعة الصين تشوهات عالميا، بعدما علنات البرازيل بلي اللقاح الثاني لي دارت الصين ولي سميتو سينوفاك اثبت فعالية فايتا شويا 50 في المائة، هاد نسبة قليلة مع المعدل اللي كتقول منظمة الصحة العالمية كيخلي اللقاح يكون فعال، ونسبة 78 في المائة.
غير هي الفضيحة الكبرى، مديرة مديرية الادوية صرحت ل"كود" بلي سينوفارم من افضل اللقاحات فالعالم، واش هاد خبيرة ولا بروفيسور ولا شنو، ولا غير طالقها. تصريح دليل على فشل وزارة الصحة ف تدبير معركة اللقاحات، كيفاش تقول مسؤولة الفاكسان الصيني من افضل اللقاحات والترخيص ديالو مزال مخرجش والعالم كامل مثاقش فيه.