بالفيديو. وصول لقاح أسترازينيكَا صبح لغز كبير.. حتى شحنة ما وصلات لوكالة التثليج واللقاح خرج من المطار بلا مايتمكنو من تصويرو الصحافيين.. وبوليس من عين المكان ل"كود": ماعندنا حتى خبار

دوزو الصحافيين عشية كلها ترقب وشكوك، من بعد ما نتقلو يغطيو دخول شحنة لقاح سترازينيكَا للوكالة المستقلة دالتثليج فكازا، اللي وصلات اليوم للمغرب من مدينة بومباي الهندية، لكن ماجا حتى كاميو، ولو واحد للوكالة، الشي اللي طرح علامات استفهام كبيرة.
وكلشي كان مترقب وصول الجرعات للوكالة اللي كتعتبر المركز الرئيسي هي اللي يمكن تحتفظ باللقاحات اليوم، فمدينة كازا اللي كتعرف أكبر تجمع سكاني فالمغرب، لكن كلشي تسنا بالساعات، ووالو.
وعرفات الوكالة، فمرات كثيرة قبل، عمليات محاكاة، دارتها وزارة الصحة باش تعرف الوقت اللي ممكن يكفيها باش توصل الجرعات للمركز، وهذشي اللي خلى الجميع يعتقد ان أسترازينيكَا أكيد غيتخزن فيها.
لكن الحاجة اللي مامفهوماش هي وجود استنفار أمني فالدخلة ديال الوكالة، كود تواصلات مع أمنيين فعين المكان، خبروها بأنهم جاو تنفيذا للتعليمات اللي عندهم فقط، وماعندهم حتى خبار على اللقاح.
واحد من الأمنيين من أمام وكالة التثليج جاه هذشي غريب، ورجح ل"كود" مايكونش اللقاح وصل اصلا للمغرب، كيف تكلم على إمكانية يكون مشا للقاعدة العسكرية فمديونة وماجاش للوكالة.
وحتى خروج اللقاح من مطار كازا حتى هو كان لغز كبير، الصحافيين ديال الإعلام الرسمي اللي كانو استطعو يغطيو وصول الطيارة، لكن ماتمكنوش من تصوير شحنات اللقاح، اللي ممكن خرجوهم من باب خرى من غير الباب الرئيسي للمطار، حسب ما صرحو بيه صحافيين ل"كود".