السلطات المحلية و الصحية فلعروبيات ديال مولاي يعقوب خدامين باش الناس لكبار يديرو الفاكسان ضد كورونا – تصاور

أعوان السلطة (مقدمين و شيوخ) مقاتلين هاد الأيام باش الناس لكبار واللّي عندهوم أمراض مزمنة يديرو التلقيح ضد وباء "كورونا". هادشي بان من خلال جولات دارتها "كَود" ببعض المناطق القروية الواقعة فوق النفوذ الترابي لإقليم مولاي يعقوب.
مختلف المناطق القروية اللّي كاينة فمولاي يعقوب فيها حركية كبيرة هاد الأيام. مقدمين وشيوخ كيقلبو على الناس لكبار. الأساس عندهوم هو توعية الناس و التواصل معاهم باش يمشيو يديرو الفاكسان. و السلطات كانت وجدات بشكل قبلي لعملية إحصاء هاد الناس المعنيين.
البارح الجمعة بدات مندوبية الصحة لإقليم مولاي يعقوب الحملة بتلقيح مجموعة من الفئات المستهدفة وكان أول المستفيدين مندوبة وزارة الصحة على الإقليم الدكتورة سناء ذاكر الله ومجموعة من الأطر الصحية العاملة بالاقليم.
هاد الحملة الوطنية، حسب مصدر من مندوبية الصحية بمولاي يعقوب، غادي تكون بطريقة تدريجية وعلى أشطر، ويستفيد منها جميع المواطنين المغاربة و المقيمين الذين تفوق أعمارهم 17 سنة.
عملية تلقيح المسنين بدات فبوادي وقرى مولاي يعقوب و كتشرف عليها السلطات المحلية. وحتى الفئات المستهدفة محمسة بزاف وتجاوبات مع السلطة.