البروفيسورة بركات عضو اللجنة العلمية ديال الفاكسان ل"كود": جميع الفئات غادير استرازنيكا وسينوفارم ومغايكونش تمييز بيناتهم وبجوهم عندهم فعالية ونجاعة حتى لناس لي عندهم 75 فما فوق والمغرب عندو سيادة علمية

قالت البروفيسورة أمينة بركات، عضو اللجنة العلمية للقاح كوفيد 19، إن "المغرب توصل بجوج أنواع من اللقاحات، لقاح سينوفارم مكون من فيروس معطل، ولقاح استرازينيكا مكون من فيروس ناقل".
وأضاف البروفيسورة بركات، في حوار مصغر مع"كود" أن:"هاد جوج لقاحات لي بجوج ظهرت الدراسات على نجاعتهم وعلى سلامتهم إلى حدود الساعة وفق المعلومات المتوصل بها". مؤكدة أن "جميع الفئات العمرية ما فوق 17 سنة معنية بهم ولا فرق بينهم في النجاعة والسلامة".
وبخصوص ما قررته وزارة الصحة الألمانية بعدم استعمال استرازينيكا للي ناس فوق 65 سنة، قالت البروفيسورة :"فيما يخص استرازنيكيا الدراسات السريرية اللي دارت على ناس فوق 65 سنة، والمصنع لا يمنع يتستعمل على الاعمار فوق 65 سنة، والمصنع قال مخصش يستعمل على الحوامل وحنا فالمغرب قررنا منديروهش للحوامل".
وأوضح المتحدثة :"المغرب عندو السيادة واللجنة العلمية قررت تستعمل هاد الفاكسان لناس لي عندهم 75 سنة فما فوق".
1/ "كود": واش ممكن نفرقو بين لقاح استرازينيكا ولقاح سينافورم؟ مثلا بالنسبة لناس لكبار فالعمر واش ميصلحش ليهم سينافورم؟
البروفيسورة بركات:
مغاديش نفرقو بين لقاح استرازينيكا ولقاح سينوفارم وممكن نعطيوهم لجميع الفئات حسب المراكز الصحية.
الفئات المعنية في الدفعة الأولى، مهني الصحة 40 سنة وما فوق، وناس ديال التعليم والامن 45 سنة فما فوق، وكبار السن 75 سنة فما فوق. والبدء في الجهات اللي فيها الحالة الوبائية الأكثر شدة.
بالنسبة لكبار السن، جوج اللقاحات صالحين لهم.
2/ "كود": امتى غادي تكتمل المناعة عن المواطنين لي غايديرو التلقيح؟
البروفيسورة بركات:
خاص المواطنين يعرفو بأن وزارة الصحة، بدات باستراتيجية هي أن اي لقاح خداه المواطن خصو يكمل فيه، ومخصوش يبدل اللقاح بين جوج جرعات، يعني اللي خدا الجرعة من واحد النوع خصو يكمل فيه.
النقطة الثانية الهامة هي أن المناعة لا تكتمل إلا بعد اكتمال الجرعتين، فالنسبة للقاح سينافورم ثلاث اسابيع بين الجرعتين، وبالنسبة لاسترازنيكيا بين الجرعتين كاينا اربع اسابيع، وباش تحقق المناعة خاص اربعة اسابيع بعد الجرعتين.
خلال هذه المدة كاملة لازم الحفاظ على الوقايات والتباعد الاجتماعي والنظافة والكمامة، وملي كياخد بنادم اللقاح كيعيش
3/ "كود": بالنسبة لليقظة الدوائية شنو خاص المواطين يديرو فحالة ظهرات عليهم اثار جانبية؟
البروفيسورة بركات:
بالنسبة لجميع اللقاحات هي أمر هام، بحيث أننا كنتبعو واش كاينين شي اعراض جانبية لي عندهم علاقة باللقاح او الدواء.
بالنسبة للقاح ضد كورونا غاتكون يقظة دوائية مهمة في جميع ربوع المملكة، وغايكون ارقام يتصلو بهم المواطنين، بحيث اي مواطن حس باعراض يمكن يتصل وغايتم متابعته حالته.
غالبية الاعراض خفيفة، من سخانة خفيفة وجع فالراس، ولا تشكل خطورة على الشخص ولا تشكل ضرورة باش الانسان يمشي للمستشفى.
4/ "كود": واش كاين عدد الجرعات المتوقعة اللي ممكن يتوصل بهم المغرب في الأسابيع المقبلة؟
البروفيسورة بركات:
اللي كانعرفو بأن التوجيهات السامية لجلالة الملك نصره الله هي تخص أننا نتوصلو الى تلقيح 25 مليون مغربي، اللي عمر ديالهم 17 سنة فما فوق
يعني المدة الزمنية وكمية اللقاحات رهين بما هو موجود عند الشركات المصنعة، وبناء عليها عاد نشوف.
5/ "كود": وضعتم خطة فيها كولشي على الفاكسان، شحال كتوقعو تجيبو فشهر فبراير ومارس؟
البروفيسورة بركات:
اللجنة الوطنية للتلقيح وضعت جميع الخطط، لكن شحال من جرعة غانتوصلو بها هي اللي ماشي فيدنا، هادشي بيد الشركات المنتجة.
كنتماو تجي كميات اكبر من هادي لي شدينا.
المغرب دار كونطرا مع هاد الشركتيني باش يلقح المغاربة 17 سنة فما فوق، حنا بدينا بالدفعة الأولى حيث ميمكنش نتسناو تا تجي دفعة ثانية، مميمكنش نعطي رقم تقديري شحال غانجيبو فالاسابيع المقبلة حيث كولشي رهين بالشركات المنتجة.
مكرهناش نتوصلو بجميع اللقاحات، باش تكون عملية سهلة وتكون مدة التلقيح 3 اشهر بسهولة.
المعطيات الدولية بينات بأن شركة التصنيع تقوم باولوية التوزيع، نتمناو ف فبراير ثم مارس نتوصلو بدفعات اكبر ويكون تصعيد متوازي لعدد الملقحين.
6/ "كود": مفكرتوش تنفتحو على لقاحات أخرى جايا فطريق بحال جونسون جونسون؟
البروفيسورة بركات:
مكاينش شي مانع نفكرو نفاتحو على انواع اخرى من اللقاحات فالمستقبل . ولكن على حسب سيرورة الامور مع شركتي سينوفارم واسترازينيكا، والامور تناقش في اللجنة العلمية حسب سلامة ونجاعة اللقاح، وتوفر اللوجستيك اللازم.
مكيمنعش شاي مستقبلا في المستقبل القريب نفكرو في انواع اخرى من اللقاح.