رحلة مع مقدمين فمزاب. كيفاش كيقلبو على الناس لكبار باش يلقحوهم. هنا ما كايناش كلشي كديرو الداخلية والبطل فالفيلم هو لمقدم

البارح الجمعة بدات عملية التلقيح ضد كورونا فالمغرب. بلات فكاع لبلايص. ولكن كيفاش كدار هاد العملية فالعروبية. كيفاش كدوز فمزاب مثلا. هنا ماشي كلشي عندو تلفون باش يرسل ل1717 اللي كاين فيه مشاكل لحد الان.
هنا 1717 كيديرها لمقدم. عملية صعيبة وزارة الصحة غير كتصور وصافي. يعني باش يوصل الرجل المسن اللي عندو اكثر من 75 عام لمركز صحي فراس العين فاقليم سطات ويدگو ليه الشوكة. قبل هاد المرحلة كاين فيلم طويل.
دابا كاين اللي عندهم امكانيات: تلفون او شي حد كيعرف شي حد فالسلطة يقدر يرسل ميساج 1717 ويعطيوه فين يديرو. هادي ساهلة الى حد ما. ولكن كاينة الاستدعا. هادي كتوجد فحالة فقيادة راس العين دائرة بن احمد الجنوبية باقليم سطات. من بعد كيكون تنسيق واللي كيوزعها على الناس فموطور هو لمقدم. كل دوار عندو مقدم. الورقة فيها باللي القايد كيرسل استدعاء لمواطن مع عنوانو ورقم البطاقة ديالو. فيه باللي كيطلب من المعني يحضر بمركز التلقيح بالحي الاداري فمركز راس العين باش يتقلح. ثم كاينة عبارة ديال راه الحضور فالموعد ضروري ومؤكد" وخاص احترام قواعد السلامة الصحية والتباعد وخاص اللي يجي بطاقة التعريف والبورطابل".
لمقدمين على موطورهم كيضربو البيست وطرقات ماشي مساعدة. هنا العدد فدواوير ماشي كبير ديال 75 عام والفوق٬ ومفرقين بزاف
لكن كاينة فئة اخرى عندها. وحدين عندهم السن باش يتلقحو. غير هو ما فراسهم وهنا كتبدا عملية البحث عليهم. كيقلبو عليهم فديورهم. كيزيدوهم فاللائحة اللي توجدات قبل. حقاش وزارة الصحة فهاد الشي ما عندهاش المعطيات.
هنا علاقة السكان كاينة غير مع الداخلية. كلشي كيدوز على الداخلية. وهنا لمقدم هو البطل فهاد الفيلم. حقاش هو صلة الوصل بين المخزن وبين المواطن.
اليوم الاول كانت الامور مزيانة. دازت بشوية السلاسة كيف قال ل"كود" عدد من الناس اللي هدرات معاهم. هادي غير البدية. واش هاد الروح غادية تبقى حتى تسالي هاد الحملة؟ نتمناو