وهادي ما غاديين يرضاو فيها الرجاويين. اللي كانو يقولو عليه "الكفيل" ولى كفيل فرقتهم. ايت منا شرا لعاب وبودريقة ل"كود": وما فراسي والو وما عندي حتى شي علاقة

الرجاويين غادي يطلع ليهم الدم. اللي كانو سماوه "كفيل" فاشارة الى رئيس شباب المحمدية الملياردير هشام ايت منا على قبال شرا شي لعابة للوداد٬ ولى "كفيل" فرقتهم.
البارح الجمعة ففيلا ديالو فانفا العليا تلاقى مع رشيد الاندلسي رئيس الرجاء البيضاوي وخالد الابراهيمي وتم التوقيع على صفقة بيع لعاب من شباب الخضرا اسمو زكريا الدرويشي لنادي شباب المحمدية. ما تعلنتش على قيمة الصفقة.
الرجاء حتى هي شرات لعابة جداد وباعت اخرين باش تفك الازمة اللي عندها ولكن ديما كانت عندهم موقف من رئيس شباب المحمدية. هاد الرئيس كان عندو علاقة مزيانة مع سعيد الناصري رئيس الوداد البيضاوي. دابا ما عرفناش اش وقع بيناتهم
"كود" سولات واش محمد بورديقة رئيس الرجاء السابق عندو يد فهاد الشي. حقاش كيتقاسم مع ايت منا حزب التجمع الوطني للاحرار. بودريقة قال ل"كود" باللي ما فراسو والو وشاف لخبار فالفايس البارح بحال ايها الناس. واكد ل"كود" باللي ما عندو يد فهاد الشي.