علاش كاين ناطق رسمي باسم القصر ومخلين هاداك المدعو البحري كيلعب. فايك نيوز ما يمكنش تبقى مؤسسات كبيرة فالدولة دايرة ليها عين الميكا خاصة ايلى تنشرات فصحف كبيرة وعندها مصداقية

احداث كثيرة وقعات وكتوقع عندها علاقة برئيس الدولة الملك محمد السادس عندها علاقة بالقصر الملكي. فيها ما هو خاص خاص وفيها ما هو خاص وعندو انعكاس على تسيير الدولة. فقضية مرض الملك خرج بيان طمأن لمغاربة بزاف. كانو مخلوعين تساءلون سيدنا فين واش عندو.
هاد المبادرة مزيان وكانت صور ليه ففترة نقاهة كتبين تحسن حالتو الصحية. فهاد الشي خرج عاود ثاني هاداك المدعو سفيان بحري وولى كيدير خدمة ماشي ديالو، ما يعرفش ليها ما عندو علاقة بها. هاديك الصفحة فالفايس اللي فيها اسم رئيس الدولة ما خاصهاش كاع تكون عندو. المؤسسة الملكية عندها الاطر وعندها الدماغات اللي دير صفحة رسمية اكثر من واعرة. علاش مازال كيخليو بحال هاد النوع يدير خدمة ماشي خدمتو. يدخل فامور ماشي ديالو.
السيد ولى منظر فامور كبيرة عليه. هاد الشي كيسيء للمغرب وللمغاربة. باش نشرات البوليساريو اشاعة على وفاة الملك وسوقوها جات صور كتكذبها فنفس اليوم. كذباتها وكذبات هاد الروايات. هنا كون كانت صفحة رسمية لملك المغرب غادية تكون عندها مصداقية اكثر. غادية ترد على اشاعات كثيرة.
الناطق الرسمي او صفحة رسمية كانت غادية ترد على اللي نشراتو البارح الصحف الاسبانية لكبيرة على الحياة الخاصة للملك وللاميرة. ماشي ببيان حقاش ما يمكنش لمؤسسة بحال المؤسسة الملكية تبقى دير بيانات ولكن راه كاين الف طريقة وطريقة للتصدي ل”فايك نيوز” ايلى كانو فايك نيوز.
الحرب لكبيرة للي خدامة فيها الجزائر ومعاها البوليساريو هي هاد القضية ديال الاخبار الكاذبة. غاديين يتعلمو من روسيا الخبيرة فهاد الشي بحكم علاقة موسكو بالجزائر. المغرب خاصو يكون مؤهل ماشي يدير عين الميكا على خبارات فصحف محترمة ماشي اي صحافة. لمغاربة كيهمهم بالاساس ملكهم هاد الشي علاش متعطشين يعرفو عليه اخبارو. هاد الاخبار غادية تكون مزيانة من خلال قنوات رسمية ولكن بعقلية اولاد الوقت ماشي مع سفيان بحري