زعماء الكرطون. واحد فالمعارضة جبان ما قادرش حتى يهدر باسمو وكيسب بنعرفة: كيطلب من لمغاربة يحتارمو التدابير الاحترازية وفريقو جاي للبرلمان. هاد المخلوق نسى باللي حضور البرلمانيين حسمات فيها المحكمة الدستورية

كاينين شي وحدين كيحسبو ريوسهم فالمعارضة وهما غير جبناء. واحد فيهم البارح هضر ل"كود" على السلوك اللي دارو البي جي دي فالبرلمان، ماشي حيث متعلق بالاتفاق بين الفرق ولا القانون، بل "لأن رئيس الحكومة بنفسه كل خميس كيدعو المواطنين يديرو التدابير الاحترازية ويحترموها ويقطع الارزاق ديال الناس" وفق تعبيره.
اولا انت جبان. خاصك تهدر باسمك ما تخباش. ثانيا انت فالمعارضة والبرلمان ما كتعرفش تفرق بين لحوايج. هادوك راهم برلمانيين ماشي مواطنين خارجين يدورو. هاد القانون راه كيهم مستقبل البلاد فالسنوات الخمس اللي جاية وممكن لسنوات اكثر.
رئيس الحكومة اللي ضعيف٬ دار اللي خاصو يدار. راه حزبو ضد هاد القانون. ايلى الاحزاب الاخرى تقولبو عاد داركو الموقف هاداك شغلهم.
البي جي دي دوز مساج سياسي اليوم، مفاده براكا مبقيناش قادرين نتنازلو، ولكن في نفس الوقت بين بلي حزب يقدر يضحي بكولشي من أجل مصلحتو، كيف دار اليوم.
البي جي دي ف قضية القاسم الانتخابي كيخاطب الدولة، ودار احتجاج بطريقتو، وغايمشي للمحكمة الدستورية.
البي جي دي ما خرقش الجلسة العمومية بهاد الحضور المكثف. من حقو دستوريا يحضرو البرلمانيين