الغباء فالتعاطي مع قضية وادو اللي فضل الجزائر. الاختيار الرياضي مكاينش فالفيفا...كاين واش بغيتي بلادك تربح ولا لا

ملي كتكون لاعب ديال الكرة، ومارستي على أعلى المستويات، كتكون بلا شك عارف أنه مصلحة بلادك تقتضي أنها تكون ممثلة فأقوى اتحاد ديال الكرة. كتكون أيضا عارف أش كيطرا فالفيفا من ضغط وكولسة وتخلويض اللي المنتخب اللي مثلتيه نتا نيت عانى منو لسنوات.
تقتضي المصلحة العامة للوطن إذن أنك دعم ولد بلادك فهاد السباق على العضوية د الفيفا، ماشي تمشي تاخد موقف متطرف وتدعم مرشح بلد خصم كروي، وعندنا معاه وضعية محتقنة هاد الأيام.
عبد السلام وادو ماشي شخص قاصر، عارف اش كيدير، وعارف الحسابات والتوازنات اللي كاينة، كما أنه عمدا قرر يدخل راسو فهاد المتاهات فقط لأنه كانت عندو تجربة غير موفقة فالبطولة الوطنية ( فهاد التجربة نيت طلب دعم لقجع باش يستمر فيها، حسبما أكد فتصريح صحفي مع إذاعة بيضاوية) واختار أنه يعادي شعب كامل، اللي كان مسؤول على النجومية ديالو وصنع ليه اسم، ماشي دول د الجوار اللي صنعات ليه هاد السمية وهاد المسيرة.
وادة استفد من الكرة المغربية، وطيلة مسار هزو الجمهور على كتافو وتغنى بيه، واللي كيقولو أنه وطني وكيتبرع للناس، مينساوش أن المنتخب الوطني خيرو سابق، هو اللي صنع وادو ماشي العكس، مكانش يعني عبد السلام وادو محيد الرسمية لمارسيل دوسايي ففرنسا واختارنا حنا باش يلعب معانا. بل العكس المغرب تاق فوادو وعطاه فرصة العمر، لكن الناس ذاكرتهم قصيرة.
أي نعم كان غباء فالتعاطي مع هاد القضايا، تخوين اللاعب والعنصرية الموجهة ليه أمر مرفوض تماما، بل تعطي مساحة أكبر لأنه ينشر البوليميك اللي باغي، ولكن وادو عارف كتر من غيرو أن جمهور الكرة عاطفي، وعمرو كينسى هاد المواقف، يمكن وادو اختار أنه ميخدمش فالمغرب من بعد، وهو حر فاختيارو ولكن بشكل كبير قلص مساحة الشعبية ديالو فهاد البلاد، وعطى فرصة لناس باغين يهدمو الكرة فالبلاد أنهم يضربو المغرب.
انتخاب مغربي فالفيفا هو ربح كبير للرياضة د المغرب كاملة، وتأثير قوي وحماية للكرة المغربية، اللي واقف ضدو ممكن يشجع منتخب آخر، غير ميسميهاش اختيارات رياضية، فيها احتقار للذكاء.