ميدي1 تيفي لي جا يولي فيها رئيس تحرير. دارو رئيس تحرير ماقاري صحافة ماعندو تجربة

السيبة وحتى المحسوبية هو واقع منصب رئاسة التحرير فقناة ميدي ا تي في، المعلومات اللي توصلت بيها كود كتقول بأن اليد اليمنى للمدير العام السابق عباس العزوزي، هو لي مزال متحكم في هيئة التحرير ديال القناة وداير فيها ما بغا.
آخر ما دار هو شد جوج ديال الصحافيين وردهم رؤساء التحرير بلا خبار المدير العام حسن خيار، وواحد من هادو معندو حتى تجربة مهنية سابقة كاع، يالله خدم هادي ثلاث سنوات فالقناة، حتى الصحافة معمرو قراها في أي معهد.
هاد "رئيس التحرير" داير ما بغا حسب مصادر كود، كيحط الأخبار لي رشقات لو، وشي نهار يتسبب فشي فضيحة للقناة لأنه معندو حتى خلفية سياسية حيت قاري غير الأدب العربي.
هاد السيد مكيعرفش يهدر حتى بالدارجة مقادة ومزال عندو شي 26 عام وولا شاف على صحافيين راكمو تجربة مهنية كبيرة فالقناة او فمؤسسات صحافية دولية مهمة.
والمشكيل الكبير هو ان هاد الجوج لي داروهوم رؤساء تحرير، معندهومش صفة رئيس التحرير فالكونترا.
واحد فيهم كيحظى بدعم كبير من مدير الأخبار لسبب غير معروف واخا كاين فالقناة اشخاص اكثر كفاءة ومهنية وتكوين منو.