موظفي البنك الشعبي كاعيين على الادارة ديالهوم. دازت علينا كحلة فكورونا ودرتو تمييز خايب بين موظفي الوكالات

موظفي البنك الشعبي توصلو قبل ايام بتعويضات الاداء ديال 2020، وهي التعويضات لي خلات غالبية الموظفين دالبنكة فالمغرب يعبرو عن غضبهم من الطريقة لي رطعات كتمشى بيها بنكتهم فالسنوات الاخيرة.
مصدر ل"كود"، قال ان ادارة البنكة دارت واحد التعويضات ماعندها لا راس لا رجلين، ومشات عطات لرؤساء الوكالات عشرة اضعاف ديكشي لي عطاتو للموظفين، رغم ان الموظف هي لي كان ففم المدفع خلال جائحة كورونا، وفوقت الخطر كان مدير الوكالة كيبقى فالبيرو ديالو مكيستقبل تاواخد في حين الموظف هو لي كيستقبل جميع الناس.
وزاد المصدر :" حنا ماشي ضد التعويض لي تعطى لمدراء الوكالات، بل بالعكس هوما كيستاهلوه، ولكن ميمكنش تعطي عشرين الف درهم لمدير الوكالة، والموظف تعطيه الفين درهم، راه هادشي دار واحد حالة غضب كبيرة وسط الموظفين، لي رجعو كيتساءلو واش حنا ملزمين من هنا الفوق نديرو اداء مزيان ونعطيو جهدنا كامل وفالاخير الادارة ماكدير حتى تقدير لهاد الجهد".
وختم المصدر بالقول ان الموظفين بداو كيتاخذو قرارات بالعمل على قدر التعويض، يعني يلا كان التعويض فيه تمييز وهزيل، غايكون الجهد والأداء كذلك، مادام ان هاد الادارة كتفكر فمصلحتها فكل واحد يفكر فمصلاحتو".
وفي ذات السياق، هاجمت نقابة البنك الشعبي بجهة الدار البيضاء السطات، مدراء الموارد البشرية البالغ عددهم 25 مديرا، معتبرة أنهم المسؤولين عن هذا التسيب والاجحاف الذي لحق الموظفين، ومنه حذف تعويضات القفة بدون اخبار أو سند قانوني، والتعويضات الدسمة للمدراء والهزيلة للموظفين.
وطالبت النقابة، موظفي البنك الشعبي بالالتجاء للوقفات الاحتجاجية ضد الادارة في حال لم يتم فتح حوار بخصوص ما يقع داخل البنك.