رمضان وكونفينمون (الحلقة 10).. الممثل عبد الإله رشيد فحوار مع "كود": قرار الحكومة ظلم الناس اللي كيخدمو فالليل واللي مابغاش يصوم حر فاختيارو

"كود" سولات مشاهير وسياسيين وفنانين ومؤثرين وإعلاميين، على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.
عبد الإله رشيد، الممثل المعروف عن دورو ففيلم "يا خيل الله"، كان من ضيوف "كود"، وعطا موقفو من السدان والتراويح..
كيفاش كتدوز رمضان دابا اللي مسدود علينا؟
ماكانديرش شي حاجة سبيسيال، عادي، ما بين المطالعة والرياضة ومشاهدة بعض الأعمال السينمائية، وماكنخرجش بالليل، كنبقى فالدار، التزاما مني بالقرار اللي اتخذاتو الحكومة ضد جايحة كورونا.
واش الإجراء اللي اتخذاتو الحكومة مزيان؟
فيه شوية ديال الصحة بحكم الوضعية الوبائية، لكن فالمقابل فيه حتى شوية ديال الظلم لبعض الناس لي خدمتهم تقتصر على الخدمة بالليل، وفنظري كيخصهم التعويض على هذ القرار جبرا للضرر.
شنو رأيك فمنع التراويح؟
كنظن أننا محتاجين لأخلاق الرسول أكثر في المعاملة ديالنا لي مفقودة اليوم بينا كمسلمين أكثر من الاحتجاج على صلاة التراويح لي نقدرو نصليوها في ديورنا، ومن بعد أكيد كلشي غادي يتصلح.
كاين اللي باغي يفطر بالعلالي، نت معاهم ولا ضدهم؟
كنشوف أن كل شخص حر في نفسه وفي اختياراته، ولكن لابد نحتارموا معتقدات الناس، وبالتالي اللي بغا يفطر رمضان يفطر فهو حر، لكن مايفرضش هذ الفكرة على ناس خرين أو يستفزهم بيها.
كيجاوك مسلسلات رمضان؟
كنظن أن الدراما المغربية ولات غادة في الاتجاه الصحيح، وهذشي غادي وكيتطور من عام لعام.
هضر لينا على الجديد ديالك؟
الفيلم السينمائي ديالي "الشطاح" قريب يخرج فقاعات السينما، وفتفس الوقت كنوجد لأعمال تلفزية من ورا رمضان إن شاء الله.