رمضان والكونفينمون9: البرلمانية حنان رحاب فحوار مع "كود": الاحتجاجات على التراويح غير قانونية لكن يجب تفهم مشاعر المواطنين.. وإلغاء الفصل 222 خاصو يتناقش بهدوء

"كود" سولات مشاهير وسياسيين وفنانين ومؤثرين وإعلاميين، على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.
حنان رحاب، البرلمانية عن حزب الاتحاد الاشتراكي للقوات الشعبية، كانت من ضيوف "كود"، وعطات موقفها من الحجر والتراوييح والإفطار فرمضان:
كيفاش كتدوزي رمضان دابا اللي مسدود علينا؟
كندوزو بحال جميع المغاربة، وكنستمر في أداء مهامي السياسية فالحزب والنقابية فالنقابة الوطنية للصحافة المغربية والبرلمانية، والاجتماعية في جمعية الأعمال الاجتماعية للصحافيين، وبالتالي أغلب اليوم كنكون مشغولة، وفي الليل كنستغل الحظر الليلي في إعداد التقارير وتهيئة المداخلات، والاطلاع على الأخبار والمواقع، يعني ختك فهاد رمضان معنداش الوقت تحك حتى راسها.
واش الاجراء اللي اتخذاتو الحكومة مزيان؟
القرارات الحكومية فيها المزيان وفيها المقبول وفيها المرفوض، أما إذا كنتي كتقصدي قرار الحجر الرمضاني بالليل، ففيه زوج نواقص في اعتقادي، الأول مكانش حلول لتخفيف على الناس المتضررين من الإغلاق، ومكانش شرح وتواصل مزيان مع المواطنين من أجل يشرحو ليهوم سبب هاد الإجراء، لأن الناس مستوعباتش التناقض بين الدنيا كلها زحامات بالنهار، وتجي حتى لليل وتسد، خصوصا رمضان عند المغاربة عندو طقوس خاصة بالليل.
شنو رأيك فمنع التراويح؟
الناس من حقها تطالب بفتح المساجد من أجل صلاة التراويح، خصوصا هادي السنة الثانية لي الناس مصلاتش التراويح بالمساجد، فصعيب الناس يتقبلو القرار بسهولة، وخاص تفهم الأمر، طبعا تنظيم مسيرات ليلية أو إقامة صلاة التراويح جماعة في بعض الأماكن فيه مخالفة للقانون، ولكن كنتمنى التعامل مع المخالفين بنوع من المرونة وتفهم شعور الناس وارتباطهم الايماني بصلاة التراويح، خصوصا إذا تبين أنها أفعال عفوية ديال مواطنين ،وماشي مدفوعة من شي جهة قد تكون عندها مصالح سياسية وكتخبا ورا حاجة الناس الدينية..
كاين اللي باغي يفطر بالعلالي، نتي معاهم ولا ضدهم؟
شخصيا مشوفتش شي صفحة فيها شباب أو مواطنين كيفطرو، ولكن إذا كانت مجموعات خاصة في الفيسبوك وماشي مفتوحة للعموم، فهاديك حياتهم الخاصة وحريتهم، وهم مسؤولون عما يقومون به، حتى بالمعيار الديني، وعلى العموم نقاش إلغاء الفصل 222 لي كيجرم الإفطار العلني في رمضان خاصو هدوء ونقاش صحي كيحترم كل الآراء، وخاص شي توازن بين الحقوق الفردية وبين هوية والشعور الجمعي ديال المجتمع، هادشي ما فيهش مع أو ضد.
كيجاوك مسلسلات رمضان؟
الصراحة متبعتش الأعمال الرمضانية إلا شي حاجات قليلة ومتفرقة خلال وقت الإفطار، عموما مكونشوفش التلفزة بزاف، بسبب الانشغالات،، وباش نحكم مثلا على سلسلة خاص نتبع حلقاتها كلها، وانا كنتفرج بشكل متقطع، لذلك حكمي مغيكونش موضوعي، غير هو لاحظت مؤخرا تطور في أداء الممثلات والممثلين والإخراج والتصوير،، ولكن شي لاخور المرتبط بالقصة والأحداث والموضوعات فما متبعاش مزيان