مؤتمر معارضي شارية فشل وماجا ليه حد.. ورئيس اللجنة التحضيرية ل"كود": جاو 150 وانتخبنا خوادر

المؤتمر الاستثنائي دمعارضي إسحاق شارية، اللي كان من المقرر يدار اليوم الأحد مع 10 دالصباح، ما جا ليه حد، وماكاينة حتى شي حاجة كتثبت أنه فعلا دار، بحيث ماحضروش الصحافة، وماتوثقوش بالصوت والصورة كما جرت العادة فجميع المؤتمرات الوطنية.
معارضي شارية استطعو قبل يعزلوه عن منصبو من الامانة العامة دالحزب المغربي الحر، من خلال قرار اغلبية اعضاء المكتب السياسي، لكن لحد الساعة ماتمكنوش المعارضين، ومنهم عناصر كثار فالحركة التصحيحية دالسبع، يجمعو اعضاء المجلس الوطني فدورة غير عادية باش يطردو الأمين العام، اللي مازال فذات الوقت كيمارس المهام ديالو بشكل عادي.
"كود" توصلات بصور قاعة بنمسعود، اللي كاينة فسيدي بوزيد بجماعة مولاي عبد الله بإقليم الجديدة، واللي كان من المقرر يدار فيها المؤتمر الاستثنائي، صباح اليوم الاحد من احد فنادق الجديدة، لكن تبين ان القاعة كتصفر، وماكاين حد، باستثناء ناس قلال لي جاو وتقولبو حتى هوما.
لكن فالمقابل، رئيس اللجنة التحضيرية للمؤتمر الاستثنائي، تكلم مع "كود" من بعد ساعتين فقط على موعد عقد هذ الجمع الهام، وقال انه صافي "كلشي داز مزيان، وتم انتخار يوسف خوادر امينا عاما للحزب، وكذلك البحري رئيسا للمجلس الوطني، والنصاب كان مكتمل بحضور 150 عضو من المجلس الوطني من أصل 250 عضو".
"كود" حاولات تتصل بخوادر، وكذلك انور بن بوجمعة رئيس الحركة التصحيحية، باش تتأكد مزيان من هذ الخبر، لكن حتى حد ما حاوب، فالوقت لي صفحاتهم على فيسبوك حتى هي خالية من أي جديد يذكر.