الازمة مع الصبليون كاينة والمغرب خاصو يدافع على راسو ولكن شكون يخلص على شوهة "المغربي" فالعالم؟ البوم صور خاصنا سنوات كثيرة باش يتنسى

كاينة الازمة المغربية الاسبانية بسباب عدم اخبار سلطات مدريد بمقدم ابراهيم غالي زعيم البوليساريو بباسبور ديبلوماسي وهويات مزورة لاسبانيا وكاين اللي وقع فسبتة.
دابا المسؤولين لمغاربة كيهدرو غير على غالي. لحد الان ما سمعنا حتى شي مسؤول حكومي كيهدر على فضيحة حريك 8 الاف مغربي فيهم اطفال وقاصرين وعائلات لسبتة. كاين سؤال للحكومة وجهاتو المعارضة. كنتسناو جوابها فالبرلمان
صور خايبة بزاف للمغاربة تناشرات فالعالم كولو. مزيان ندافعو على ريوسنا ونخرجو فالخارجية بتصريحات. ولكن هاد الشي راه ما يمكن يقنع حتى عاقل فالعالم باللي هاد الصور سبابها استقبال غالي. بالعكس يزيد كيفس صورتنا فالعالم. كنقولو المغرب شريك موثوق. يعني خاص الثقة.
الصور اللي نتاشرات فكاع جرائد العالم خاصة صورة رضيع عندو عامين كينقدو من الغرق واحد من الحرس المدني الاسباني٬ صادمة بزاف لينا. صورة لطفل عندو 6 اشهر نقدو واحد فجيشهم كيزيد يضر بلادنا. صورة رضيع اخر خارج من الحدود صعيبة لينا وما نستحقوهاش. بلا ما نهدرو على الاطفال على العائلات على اسر كاملة حركات.
حنا هنا داخليا فبلادنا خاصنا نقاش. لحد الان حتى واحد ما قدر يديرو من السياسيين او حتى من جمعيات المجتمع المدني اللي كدافع على الطفولة. كلشي ضارب الطم. اللي خدا القرار قودها. تبريرات وزير الخارجية ما شاداش.
صورة صعيب تمحيها. صعيب تنسيها. خاصنا نهدرو عليها داخليا. ما نخليوش غير الاجانب خاصة الغرب يهدر عليها.
بلادنا حققات امور كثيرة ماشي غير فالبينات التحتية ماشي غير فالتنمية ماشي غير فالاقتصاد وعالم المال حتى فالثقافة والفضاء... بلاد بامكانياتنا لقحنا لحد الان لاكثر من 12 مليون. هاد الشي يحطنا فسكة الدول النائمة. ما بقيناش غير سائرين فهاد الطريق. لكن هاد الصور ضربات كلشي هاد الشي فالزيرو.
خاصنا نهدرو عليها وخاص ربط المسؤولية =اللي خدا القرار او اللي كان عندو دور= بالمحاسبة. ما نستحقوش نكونو بلاد يقولو علينا مسؤولين حكوميين "مبتزين" "كنوظفو الفقر فمعارك سياسية". وخاص خدمة مزيانة فالديبلوماسية باش نقادو هاد الصورة. خدمة طويلة بزاف ولكن خاص ماليها ماشي هاد لوزير ديال الخارجية ناصر بوريطة اللي كيعرف غير يضارب. باغي يعزلنا على العالم.
يستحيل المغرب يكون عندو عدو فالشرق اللي هو النظام الجزائري ونديرو عدو فالشمال وشوية فالغرب اللي هو اسبانيا.
الاولوية اليوم هو التفكير فاصلاح صورتنا فالعالم. فاوربا. هادي مسؤولية الدولة اولا وكل مغربي مغربي فالعالم ثانيا