وخليونا من هاداك المدعو سفيان بحري. وصورة محمد السادس بالحريري ومحمد بن سلمان تغني على مليار تخربيقة ديال هاداك اللي مدصرينو: سيدنا بصحة جيدة وبدا لقاءاتو الرسمية ولمغاربة ما بقاوش مخلوعين وطمأنو عليه

كان يكفي تويت فيه جوج كلمات “لا تعليق” مع صورة باش كلشي يوضح. تويت لرئيس الوزراء اللبناني سعد الحريري وسيلفي خداه هو كيجمعو بالملك محمد السادس وولي عهد السعودية محمد بن سلمان. الصورة في مطعم باريسي. ب3 موجوين تماك.
لعشا واخا خاص ولكن الصورة كيتبين حميمية بين الثلاث. صحاب كيتعارفو ومزيان. طريقة البركة والابتسامة كلشي كتقول باللي علاقة بيناتهم سمن على عسل. بلا ما نهدرو على هاد النقطة والخلافات التي قيلت وتقال بين الثلاث. نهدرو على اللي كيهمنا بالدرجة الاولى وهو الملك محمد السادس.
يبدو بصحة جيدة ناشط مرتاح. صورة احسن من مليار صورة ديال هاداك سفيان بحري. هاداك اللي كيتكلم باسم الملك وينقل صوره على صفحته بما ما يكون عندو شي صفة. لمغاربة ما كيعرفوش وما عارفينش علاش كيتكلم باسم مؤسسة مركزية بحال الملك فهاد الطريقة.
هاد السيد نشر صور كثيرة مع مواطنين وملكهم فباريس. جات الصور باش طمأن المغاربة على صحة ملكهم بعد العملية الجراحية اللي جراها بباريس قبل اشهر. لمغاربة تخلعو. اشاعة طلقاتها البوليساريو وروجاتها الجزائر ومشات حتى ان الملك توفى كاع٬ زاد هاد الخلعة.
دابا هاد الصورة كترجع كلشي. كترجع الثقة فاقتصاد ناعس شوية. كترجع الثقة فتجارة تاثرات بزاف بهاد الاشاعات. شي وحدين فدرب غلف وقريعة نزل الرواج عندهم بالنص وحتي شي محلات لبيع الاثات كيف اكد احدهم ل”كود” كان كيدير 3 مليون درهم فالشهر مع هاد الاشاعات المسمومة والحكومة الغبية يالله كيدير بزز مليون درهم رقم معاملات.
اكيد بعد صورة البارح الامور غادية تحسن بزاف بزاف. بعد صورة البارح كانت فرحة كبيرة عند المغاربة. بانت فوسائل التواصل الاجتماعي. فالفايس. فتويتر. كلشي كيبارطاجي الصورة. كلشي كيعلق. كلشي فرحان. ماشي كلشي كلشي ولكن الغالبية العظمى. هاد الشي كيوضح باللي التواصل خاصو مؤسسة رسمية ماشي بحري او بري او جبلي.