السياحة فالبلاد مازال كتعرف أزمة بسباب كورونا.. وزير السياحة السابق لحسن حداد ل"كود": خاص الحكومة تفعل تدابير النهوض بالقطاع وتعطي تاريخ حلان الحدود حيت الإقلاع السياحي كيتوجد ليه 3 شهور قبل

قال لحسن حداد، وزير السياحة الأسبق، أن قطاع السياحة فالمغرب تضرر بزاف مع كورونا، وواخا الحكومة دارت 21 تدبير فاتفاقية العقدة، فهذ التدابير ماتنفذوش باستثناء تدبير الإعانات ديال صندوق الضمان الاجتماعي، "وحتى هذ الإعانات ديال 2000 درهم فيها إشكالات، وكتتعطل، وخاص الحكومة تنفذ باقي التدابير".
وزاد حداد، فتصريحو ل"كود"، أن الحكومة مطالبة باش تعطي تصور وتاريخ لفوقاش الحدود غادي تحل وتستأنفو الرحلات، حيت كيخص، حسبو الفاعلين فالقطاع السياحي يوجدو للانطلاقة السياحية قبل ب3 شهور على الأقل وخاص يتعلمو من الآن.
وحول إمكانية تدير "لارام" فاييت بسباب الأزمة، كيقول وزير السياحة فحكومة بنكيران: "لارام هي اجنحة المغرب على المستوى الدولي، والدولة مايمكنش تسمح فيها وتخليها تدير فاييت، بالعكس بالخطوط الملك المغرب متواجد فأوروبا وأفريفيا، وخاص الآن تصور جديد ونموذج اقتصادي للنهوض بيها وكيفاش خاصها تشتغل...".
وفجوابو على سؤال "كود" حول السبب فنظرو من توقيف الرحلات لدول كثيرة واخا الوضعية الوبائية تحسنات، قال حداد انه مايقدش يجاوب حيت ماعندوش معطيات كافية بشان هذ القرار.
وتأسف الوزير الاستقلالي لأن مقاولات كثيرة غارقة هذي كثر من عام. وعندها كريديات، وتوصلات بضريبة الرسم المهني واخا ماشتغلاتش، وهذشي بالنسبة ليه خاصو حل.