نائبة رئيس الحكومة الاسبانية ردات على "صاحبتها" بنيعيش: حنا بلاد عندنا سيادة واللي وقع اعتداء على بلادنا وباغيين الرباط تحتارمنا كيف كنحتارموها

كارمن كالبو نائبة رئيس حكومة اسبانيا الاولى ردات على خرجة كريمة بنيعيش سفيرة الرباط فمدريد. بنيعيش كانت خرجات وهددات الصبليون باش قالت "المغرب أخذ علما بذلك، وسيتصرف بناء عليه" في اشارة الى تصريحات لايا گونثاليث وزيرة خارجية الحكومة الاشتراكية.
كالبو المعروفة بتوازنها وهدوءها قالت باللي المغرب "تجاوز حدود حسن الجوار" باش سمح بالاعتداء على الحدود الاسبانية. كما اوضحت فحوار مع "كنال سور تي بي" "باغيين نحتارمو المغرب. لكن اللي وقع ما كانش يوقع. راه اعتداء. ما غادينش نقبلوه"
كالفو قالت باللي بلادها باغية تخدم للمستقبل على علاقات ثنائية مزيانة "عندنا احترام كبير للمغرب ولكن ما يمكنش نسمحو بداك الشي اللي وقع".
كريمة بنيعيش كانت وصفات البارح تصريحات وزيرة الخارجية الاسبانية ب"غير الملائمة" واضافت انها كتقدم و"الوقائع المغلوطة". واضافت ان ما قدمته امام البرلمان والصحافة "واصلت فيها تقديم وقائع مغلوطة، وإصدار تعليقات غير ملائمة"، مضيفة أنه "لا يمكن إلا أن نعبر عن الأسف للطابع البئيس وللانفعال والعصبية التي رافقت هذه التصريحات".
واعتبرت هاد الازمة مع الجارة الشمالية بالي "كشفات "الدوافع الخفية ومخططات بعض الأوساط الإسبانية، التي ما زالت تلح على الرغبة في الإضرار بالمصالح العليا للمملكة منذ استرجاع الصحراء المغربية سنة 1975′′. وقالت " يحق لنا، بالتالي، التساؤل عما إذا كانت هذه التصريحات الأخيرة خطأ شخصيا للسيدة الوزيرة، أو أنها تعكس النوايا الحقيقية لبعض الأوساط الإسبانية المعادية للوحدة الترابية للمملكة، القضية المقدسة للشعب المغربي ولكل القوى الحية للأمة"
وأكدت بنيعيش أن "الاحترام المتبادل والثقة بين البلدين، اللذين تحدث عنهما السيد رئيس الحكومة الإسبانية، أضحيا ، للاسف، موضع شك حاليا".
نائبة رئيس الحكومة اوضحت فتصريحها لنفس القناة باللي للمغرب الحق يؤول استقبالنا لابراهيم غالي =زعيم البوليساريو= كيف بغى ولكن حنا راه عندنا العدالة مستقلة عن السياسة" كاشفة انه غادي يمثل نهار الثلاث الجاي 1 يونيو امام المحكمة واوضحت ان بلادها "عندها سيادة.
كما عاودات قالت باللي "المغرب بلد صديق وجار وعندو تاريخ مشترك مع اسبانيا وباللي على هاد الشي خاص الخدمة على هاد الجورة وعلى هاد المستقبل.
واوضحت باللي بلادها كتحتارم المغرب وكنطلبو من الرباط تعاملنا بالمثل
دابا خرجات لايا بتصريحات جاوباتها بنيعيش وباش صعدات ردات عليها امرأة اخرى فالحكومة الاسبانية اللي هي كالبو اللي تعتبر صديقة لبنبعيش وكتحضر بشكل مستمر لاحتفالات سفارتنا بعيد العرش.