جامعة الأخوين اللي دخلت لمرحلة التخونيج والتطرف خرجات بيان ضد الأستاذ أشبي بسبب تصاورو عريان.. والأخير ل"كود": ماعندهم حتى دليل واختارعو قصة تستحق تكون فكتاب "1984" لجورج اورويل

جامعة الأخوين اللي تشوهات سمعتها بسبب طريقة تعاملها مع الأستاذ الأمريكي أرون أشبي Aaron Ashby، يمكن بسبب ميولو الجنسي، دارت بيان كاتزيد تأكد بلي هاد الجامعة دخلت لنفق "التخونيج" المسدود، بلاصت ما تعطي ما يفيد على أن ما قاله الاستاذ أشبي، هاجمتو بطريقة بئيسة من خلال الادعاء بأن نشر صور عارية له ضد قوانين الجامعة، رغم أن الاستاذ طالبهم بفتح تحقيق على شكون اللي نشر هاد التصاور.
فهاد الصدد قال أشبي ل"كود" :" كنحس بغضب كبير وكيتزاد هاد الغضب فاش كنشوف ان السؤال ديالي مجاوبوش عليه، وهو السؤال نفسه اللي حطيتو لجامعة الاخوين منذ نونبر 2020، وهو فين الحجج، وفين الوثائق الثبوتية اللي كادعم كلام جامعة الاخوين فالبيان؟ انا نقوليك، مكايناش! الاخوين عمرها احترمت قانون الشغل ولا حتى القوانين ديالها فهاد القضية".
وأضاف اشبي ل"كود" :" رغم انني طلبت منهم يتحققو وعاودت طلبت منهم يقلبو ويفتحو تحقيق، عمرهم فتحوه"، مؤكدا أن :"هاد البيان كيبين حاجة وحدة، وهي كيفاش الجامعة اختارت قصة موازية للأحداث الحقيقية وكيفاش تعاملات معاي".
وزاد اشبي واصفا ما جاء في البيان ب"الاختراعات والقصص اللي تستاهل تكون في كتاب 1984 ديال جورج اورويل".
وأوضح المتحدث: "هادشي مكيفاجأنيش حيث هذا اسلوبهم الاول، وطريقة تعاملهم مع حقوق الانسان، وحقوق الاساتذة وحقوق الطلبة، هادشي علاش السفارة ديال ميركان وقفاتلهم الدعم".
وأردف اشبي ل"كود" :"ماشي انا لي سربت تصاوري عريان، وحيث الجامعة عمرها بغات تعرف الحقيقة، مقبلوش ومافتحوش التحقيق باش نعرفو الحقيقة، وتكون عندنا الحجج".
وشدد المتحدث :"وفي نفس الوقت ادارة الاخوين قلبات واش عندي شي سوء سلوك، وطبعا مالقاو والو، حيث ملي بديت معاهم حتى لاخر يوم ديال الخدمة احتارمت قيم الجامعة وقوانينها وتبعت قانون الشغل المغربي بالحرف".
وزاد :"هاد البيان معندو حتى قيمة او تبعة، حيث ادارة الاخوين كتعاود قصة خيالية.. مستوحية من واقع موازي ماعندوش علاقة بالواقع وكيحسبو راسهم فوق القانون وفوق الاساتذة والطلبة".
وكان بيان صادر عن الجامعة كيقول إن "جامعة الأخوين تؤكد ارتباطها القوي والواضح بقيم احترام الحريات الفردية والتنوع والتسامح". هادشي كيكذبو الايميل ديال القنصلية الامريكية اللي اكد وقف الدعم بسبب قضايا تتعلق بالتحرش وحقوق الانسان.
والجامعة أوضحت فبيانها أنه "تم إنهاء العقد المحدد المدة (CDD), الذي كان يربط هذا الأستاذ بالجامعة، بالتراضي في الالتزام التام بشروط عقد العمل والتشريع المغربي, وقد تم تقرير ذلك إثر نشر لصور له على الإنترنت وهو عار، الفعل الذي استنكره أساتذة وطلبة وأولياء أمور، إذ انتهك بذلك قيم وأنظمة الجامعة". وهادشي كذبو الاستاذ.