واش خسر التجمع مقعد الناظور؟. واخا رجع ابرشان للاتحاد الاشتراكي خطة التجمع انهم يحتلو صدارة الانتخابات التشريعية محليا وحتى وطنيا

التجمع الوطني للاحرار، بدل استراجيتو فالناظور، بعدما كان عطى تزكية البرلمان لمحمد ابرشان، لكن الحزب تراجع عليها، بسباب الابتزاز لي بغى يديرو ابرشان للاحرار، واللي طلب منهوم انه هو لي يختار المرشحين فالجماعات.
مصادر كود، قالت أنه كان متوقع بأن التجمعيين غايرفضو الضغط ديال ابرشان، حقاش السيد باغي يسيطر على مجموعة من الجماعات ويدير فيها ناسو باش يبقى يتحكم فالعقار والمشاريع كيف بغى فالاقليم، وهادشي مايمكنش يدار، لذلك قررات قيادات التجمع تعطي التزكية لحليم فوطاط رئيس بلدية بني أنصار القادم من حزب البام، بينما رجع ابرشان للاتحاد وخذا منو التزكية.
وزادت مصادر كود، أن التزكية لي كانت غاتعطى لفوطاط تاني ماكملاتش حقاش السيد فضل أنه يترشح فقط فالبلدية ومابغاش البرلمان، هادشي خلا الاحرار يفتحو باب الترشح من داخل المناضلين، ومن قواعد الحزب تقدموا ثلاثة دالمرشحين، الاول محمد القدوري لي كان رئيس غرفة الصناعة التقليدية سابقا، والتاني لحبيب فانة رئيس بلدية ازغنغان، والثالث محمادي توحتوح رئيس جماعة بوعرك.
تنسيقية التجمع فالناظور صوتات انها تعطي التزكية لمحمادي توحتوح، وحسب مصادر كود، فتوحتوح كان مستحيل ياخذ مقعد فالبرلمان بوحدو، لأنه كيعتامد على دعم الناس فجماعة بوعرك، والمعروف أن جماعة بوعرك عمرها قدرات طلع برلماني واحد حقاش مكاينش كثافة سكانية تعطي صعود مرشح واحد، بالاضافة لأن جميع الاحزاب هاد المرة غاتقسم الجماعة، حقاش كاين انتخابات جماعية وتشريعية فنفس اليوم، واللي غايصوت على شي حزب، غالبا ايصوت عليه فاللائحتين.
ولكن العامل لي غايطلعو هي الاستراتيجية لي دارت الاحرار عبر دعم مرشحي الحزب بالاقليم لمرشح البرلمان، هادشي غايعطي دفعة قوية، سيما أن الاحرار عندهوم ترشيحات قوية فبني انصار لي رئيسها فوطاط هو لي غايترشح، بالاضافة لبلدية الناظور، وزيد عليه جماعة بوعرك لي توحتوح منها، وحطو ترشيحات قوية فكل جماعة.
مصدر قيادي فالتجمع بجهة الشرق قال ل"كود"، أن التجمع داير استراتيجية للحصول على الرتبة الاولى، واخا المرشح مايقدرش يجيب مقعد ديالو ولكن التجمع داير استراتيجية لي غاتجيبلو ثمانية مقاعد فجهة الشرق، وهاد الاستراتيجية مطبقة على المستوى الوطني وغاتأهل الحزب أنه يحتل الصدارة فالانتخابات القادمة بكل تأكيد.