عبديلاه الهباط يوتوبر مغربي دار فيديو على اوطيل راديسون بلو وكيفاش غالي ومخرب وتعاملو معاه خايب ولكن التعليقات كانت عامرة بالحقد حيت شد ليلة بربعلاف درهم

عبديلاه هباط يوتوبر مغربي عندو محتوى ديال اللياقة البدنية، انا متبعو سنوات هادي ملي بدا ببورطابل في الصالون وكان كيهدر على الكاليستينيكس، حاليا كيتعتبر يوتوبر ناجح وقدوة لبزاف ديال الشباب والصراحة راه قصة نحاح محفزة، السيد بدا من زيرو لا من ناحية الكاريير ديالو كيوتوبر او الفورمة لي طلع، كان رقيق كي العود دابا راه صح من ظالم، والقناة ديالو محركة مزيان، هاد ليامات دار فيديو حول التجربة البئيسة ديالو في اوطيل راديسون بلو في السعيدية، وكيفاش أنه خلص ربعالاف درهم من اجل خدمات مقودة عليها، وشامبر فيها القطرة بحال الى بايت في براكة، والناموس والدبان وعاد زادو خداو ليه تسعمية درهم غير هاكاك ومتعاملوش معاه مزيان، المهم بحال أي واحد ضروري متكون شي نهار عشتي تجربة خايبة في أوطيل أو مطعم أو مدينة وعادي انك تشاركها مع الناس، أو حتى تحذر الناس من شي بلاصة تعرضتي فيها للنصب أو للمعاملة السيئة.
لي ماشي عادي هو المعلقين المغاربة خلاو الهدف من الفيديو لي دار عبديلاه، ومشاو كيعلقو فقط على ثمن المبيت لي واصل ربعالاف درهم، " نتا كريتي بربعلاف لليلة تستاهل راها صالير موظف كون شديتي برطمة ب 300 درهم وهنيتي السوق" فقط حيت واحد اصبح قادر ماديا يشد اوطيل بربعلاف درهم فماشي من حقو انه يتشكى من سوء المعاملة او النصب او الغلا، لأنه مشا للتهلكة بيديه، وكان خاصو يكري بيت في السطح تحيهم مية درهم للواحد وداك الساعة الى تشكى نتعاطفو معاه ،" وا خوتي انا غير ولد الشعب وبغيت حتى انا نتبحر وكرينا بيت مع العشران وقطر علينا السقف"، بحال هاكا عاد يتعاطفو معاك المغاربة ويحسو بيك واك بصح تعرضتي للنصب، اما لاباس عليك فراه بالضرورة خاص يتنصب عليك غير حيت عندك، ولي معندوش يدير فيديو من بيت مزوج فيه ووالد خمسة ويبغي المساعدة في الكرا كولشي ينوض يجزي يعاونو يخلصو ليه لكرا باش يزيد يولد شي خمسة خريين.
لوطيلات وأماكن المبيت في المغرب غالية وبزاف وهادشي معروف، بالاظافة كاين وطيلات لي غاليين غير هاكاك وملي كتدخل ليهم كتلقى اعمال الصيانة ماتدارتش قرن وزمارة، وخصوصا دابا بدعوى كورونا اعمال الصيانة كاين لي ماتدارتش او كتدار ولكن غير قداوية، وفي نفس الوقت كتلقى لوطيل قدام ولكن محافظ على نفس الثمن او زاد گاع، ومن حق أي واحد خلص شي خدمة في هاد البلاد انه يتلاقاها كما يجب، أي مستهلك أيا كانت الطبقة الاجتماغية او القدرة الشرائية ديالو راه من حقو يتشكى ويهدر على حقو، واحد الحقد كلير وكثير على لي دار ولو جوج دراهم زايدة على الناس صافي راه خاص يرجع فين كان، خصوصا هادوك لي بداو من الزيرو كيكون الحقد عليهم زايد حيت كانو قراب وبعدو، بنادم عندو الفلوس تزاد بيهم او دارهم خاصو يكون قدوة ويعطينا حافز باش حتى حنا نحاولو ، ماشي نحقدو عليه حيت دار.