محتاجين للبي جي دي فمغربنا وخاص الحفاظ عليه ماشي قتلو بحال الاتحاد الاشتراكي. حزب قتلاتو الحروب الداخلية مع بنعرفة ووصل مهلوك للحملة ولكن خاصو يبقى قوي وحاضر وطنيا

اليوم تبدا الحملة الانتخابية للانتخابات التشريعية والبلدية. انتخابات غادية دوز فظروف استثنائية بسباب هاد الجايحة ديال "كورونا". كلشي كيتسنى نتائج هاد الانتخابات اللي غادية تعطي صورة لمغرب 5 سنين الجاية. سنين صعيبة بزاف بسباب تبعات الجايحة الاقتصادية والاجتماعية المكلفة.
كاينة احزاب مرشحة تكون فالصدارة. الصراع غادي يكون ثلاثي على الصف الاول بين الاحرار والعدالة والتنمية وصحاب التراكتور. الحزب اللي ممكن يخلص كلفة كبيرة بسباب القاسم الانتخابي وبسباب 10 سنوات فالحكومة هو البي جي دي. هاد الحزب عاش طلعات ونزلات فحكومتي بنكيران وبنعرفة.
الحزب كيعرف غليان داخلي كبير مقارنة بباقي الاحزاب. يمكن هادا دليل علي ديناميتو ويمكن يكون بداية مؤشر علي تصدع كبير فيه.
المغرب محتاج هاد الحزب. محتاج لصوت محافظ يلعب اللعبة السياسية قدام الجمهور ماشي وراه. خاصو يبقى عندو حضور وطني لان الدولة المغربية كتحتاج لهاد العينة من الاحزاب فلحظات معينة من تاريخها.
الحزب دار دورو فمحطات من هاد التاريخ. شكون كان حتى يتصور ان زعيم حزب اسلامي فشي دولة مشرقية او مغاربية يقدر شي نهار يوقع اتفاقية مع اسرائيل. هنا كان الاستثناء المغربي. كانت البي جي دي. كان بنعرفة.
كانت قيادات فالحزب دعات باش الحزب يمشي للمعارضة بعد انتخابات 2021. هاد الدعوات بداها بنكيران هادي مدة واخا خدا مسافة اليوم من القيادة الحالية للحزب. بنكيران كان مع فكرة ان ولاية ثالثة منهكة وخاص الرجوع للمعارضة لبناء الحزب. من بعد جا مصطفى الرميد اللي مشى فاتجاه اقتراح نقاش عام فالحزب على تقليص المشاركة. عوض ما يتفتح هاد النقاش دارو فيه.
صعيب بل مستحيل يرجع بنكيران والرميد مجموعين للحزب. محتمل يرجع بنكيران بعد ما تسالي مهمة القيادة الجديدة بعد انتخابات 8 شتنبر ولكن الرميد طلق الحزب لاسباب تخلط فيها الصحي بتباين الافكار. محتاج يرتاح دابا.
واخا فشل الحزب باش يلقى صيغة لخلق تناوب سياسي ويطبق شعارو اللي كيعاودو ديما "الوطن قبل الحزب"٬ لبلاد محتاجاه قوي. محتاجاه فاعل. محتاجاه يؤطر فئة من المجتمع عندها افكار محافظة.