صحاب البام ومؤسسيه وشلاهبيتو والشناقة ديالو تحركو. حزب فشل فالمعارضة فتخليق الحياة السياسية رجع لاساليبو إلياسية وباغي يدير ميسا بالاعيان وفين ما كان شي واحد عندو لوسخ ركب التراكتور

حزب الاصالة والمعاصرة جاه وحي من عفاريتو وتماسيحو باش يساليو لمضاربة الداخلية وبدا فموجة روكريتمون للاعيان قبل الانتخابات بشهرين.
اليوم جاب اعيان ومازال كيقلب على ماكينات انتخابية فالدقيقة 90 باش يتقدم للانتخابات التشريعية. حزب من ساسو لراسو خطأ. خطأ الولادة كيف قالو عليه خصومو السياسيين وخطأ الاسلوب كيف فضحاتو قيادات حزبية مختلفة.
مع مرحلة ما بعد الياس العماري كان كلشي كيتسنى اختفاء حزب اضرارو للديموقراطية فبلادنا اكثر بكثير من منافعو. جا حكيم بنشماش وشفناهم كيضاربو غير على لفلوس. الياس دوز مرحلة فشل فيها فشل كبير وربحو بنكيران عبد الاله الامين العام حينها لحزب العدالة والتنمية. ماشي غير ربحو بل عراه وخلاه يرجع للحجر ديالو. يرجع يواصل بدرجة اقل تخصصو. الكولسة.
بعد بنشماش كان الحزب فالطريق للانقسام وجا عبد اللطيف وهبي. فشل فكلشي. حزب عندو 102 نائب فمجلس النواب وما حاضرش فالمعارضة حتى النهار اللي كينزل الوحي ويخرجو يقولو كلام محفوظ. عندكم نموذج البرلماني المتابع فقضايا المهاجري اللي كان كيرأس لجنة الداخلية نموذجا.
حزب فشل حتى يدير مجلس وطني ديالو من نهار وقعات انتخابات مازاكان لعبد اللطيف وهبي. حزب مازال ما دارش مؤتمر شبيبتو هادي سنوات.
البام كان ممكن يرجع حزب عادي لو ان القيادة خداتها وحدة بحال فاطمة الزهراء المنصوري. فشل حتى فهاد الشي وطيلة حكومة بنعرفة كانو غايبين فاشلين. خوا مقراتهم وقربات الانتخابات وبداو اعيانهم يقلبو على احزاب اخرى. هاد ليام جاهم الوحي باش وهبي يولي غير كومبارس. كلشي بيد اخشيشن وصحابو. بداو يرجعو اعيانهم او يجيبو اخرين. فتحو بابهم باش اللي ركب على التراكتور فهو امن. هادي كانت رسالة للي عندهم لوسخ. عندهم قضايا على ظهرهم.
طبعا امور كثيرة تغيرات حتى فتعامل السلطات المحلية مع مرشحي البام. هاد الشي غادي يكون عندو تبعات ديالو. كاينة احزاب اللي غادية تسكت باش يمشيو منها ناسها ولكن كاينة احزاب غادية تحيح واخرى بحال البي جي دي غادية تقدر تكون هي الرابح فعودة كلها دوباج للبام.
اساليب الياس او غيرو ما غادياش لا تقضي على البي جي دي لا طور بلادنا خطوة اخرى نحو الديموقراطية. الدليل ان هاد الحزب همو الاول يجيب ناسو ماشي يقدم برنامج انتخابي واضح بارقام ويكون محط نقاش.
البام اللي تفكر فيه باش يقاد المشهد الحزبي فالبلاد من النهار اللول فشل. تحول لحزب كيخلع كلشي. بنكيران جنب لبلاد باش قضى على الياس العماري مخاطر حتى حد ما كان يقدر يتوقعها. المخاطر مازال قايمة الى الاساليب اللي شفنا اخيرا بقات مستمرة. مصالح بلاد ربحات الى حد ما معركة كورونا٬ اقوى من نفسية اشخاص فشلو يديرو السياسة.