شكون مورا هاد الاشاعة ديال تأجيل الانتخابات التشريعية؟ اللي عارف راسو خاسر الانتخابات هو اللي طالقها وناسبها زورا للجنة العلمية اللي ما سوقهاش بحال هاد القرارات

اشاعة كبيرة طلقات هاد العشية مفادها ان قرار تأجيل الانتخابات التشريعية والبلدية اللي غادية تكون فشهر شتنبر غادية تأجل بسباب الحالة الوبائية فالمملكة.
صحاب الاشاعة قالو باللي اللجنة العلمية دارت اقتراح وباللي القرار تخاد وغادي يتعلن عليه على ابعد تقدير بعد 5 ايام من اليوم. على فرض ان هاد الاقتراح كاين٬ واخا هاد الشي مستعبد٬ اولا هاد القرار ماشي بيد اللجنة العلمية. ثم هاد اللجنة غير كتقدم توصيات
مروجو هاد الاشاعة هما اللي متأكدين باللي ما غادينش يجيو اللولين. رئيس الحكومة زعيم البي جي دي كان ساهم فهاد الشي باش قال ففوروم لاماب هاد الاسبوع باللي "كلشي ممكن" باش سولوه على امكانية التأجيل.
دابا واش حنا بوحدنا فالعالم اللي عندنا كورونا. راه ميريكان باش كانت دايرة فيها حالة دارت انتخابات رئاسية. دول بحالنا دارتها فهاد الجايحة. هاد الشي كافي باش ينظم المغرب الانتخابات
ممكن اليوم نسدو اكثر ندريو اجراءات اشد ونظمو الانتخابات. الحملة تختالف والطريقة ديال التواصل تختالف ونهار التصويت يكون التباعد وكلشي يدوز مزيان.
صعيب بزاف على محمد السادس ياخد قرار التأجيل. هادي غادية تعطي صورة خايبة بزاف على لبلاد. ما كاينلاش نختاروها دابا.
الحياة غادية تستمر بكورونا او ايلى قلات. المغرب محتاج لانتخابات باش يختار لمغاربة حكومة قادرة تخرجنا من هاد الجايحة.